سەردێڕ:

سلێمانى.. ئەمڕۆ مەراسیمێك بۆ شەهیدانی ١٧ى شوبات بەڕێوەدەچێت

فۆتۆ: 
2020-02-17

2367 جار خوێندراوەتەوە

پاشنیوەڕۆى ئەمڕۆ لە هۆڵى ڕۆشنبیرى لەشارى سلێمانى مەراسیمێک بۆ یادى شەهیدانى خۆپیشاندانەکانى ١٧ى شوبات ڕێکدەخرێت و تێیدا خەڵات بەسەر سێ کەسایەتى شارى سلێمانیدا دابەشدەکرێت.

کارزان تاریق پەیامنێرى ئێن ئاڕ تى رایگەیاند، بڕیارە ئەمڕۆ دووشەممە بە بەشداری كەسوكاری شەهیدانی ١٧ى شوبات و ڕۆشنبیران و ڕۆژنامەنوسان لە شارى سلێمانى مەراسیمێک بۆ یادى ئەو شەهیدانە بەڕێوەبچێت.

ئاماژەى بەوەشکردووە، وەك نەریتی ساڵانەی یادەكە بڕیارە ئەمساڵیش لەو مەراسیمە تایبەتەدا خەڵاتی ڕێزلێنان بەسەر سێ كەسایەتی شارەكەدا دابەشبكرێت.

هاوكات، هەر ئەمڕۆ لەیادی نۆ ساڵەی ئەو رووداوەدا كەسوكاری شەهیدانی خۆپیشاندانەكان چوونە سەر گۆڕی شەهیدەكانیان و باسیان لەوەشكرد تائێستا حكومەت بكوژانی ڕۆڵەكانیانی ڕادەستی یاسا نەكردووە و بە سزای یاسایی خۆیان نەگەیشتوون.

لە مانگی شوباتی ٢٠١١دا و دوای خۆپیشاندانەكانی وڵاتانی عەرەبی كە بووە هۆی ڕوخاندنی چەند ڕژێمێكی ناوچەكە، لە هەرێمی كوردستان و بە دیاریكراوی لە شاری سلێمانی خەڵكی دژی گەندەڵی و نادادی ڕژانە سەرشەقامەكان و بەپێی ئامارەکانیش، بەهۆی تەقەی هێزە ئەمنییەکانەوە لە خۆپیشاندانەکانی ١٧ شوبات و ڕۆژانی دواتردا كە دوو مانگ بەردەوامبوو، ١٠ کەس شەهیدبوون و تائێستاش هیچ کەسێک لەسەر شەهیدبوون و برینداربوونی خۆپیشاندەران سزا نەدراوە.