سەردێڕ:

بەشیر حەداد: لیستی پلەی دامەزراندنەکەی کەرکوک نادادپەروەریی تێداکراوە

فۆتۆ: 
2020-01-26

998 جار خوێندراوەتەوە

بەشیر حەداد، جێگرى دووەمى سەرۆکى پەرلەمانى عێراق رایگەیاند، لیستی دامەزراندنەکەی کەرکوک نادادپەروەریی تێداکراوە و هەر پلەیەکی دامەزاراندن بۆ ئەو شارە دەبێت بە هاوسەنگى پێکهاتەکانى ئەو شارە بێت.

بەشیر خەلیل حەداد، جێگری دووەمى سەرۆکی پەرلەمانى عێراق لە نوسینگەی تایبەتی خۆی لە هەولێر لە کۆبوونەوەى لەگەڵ نوینەرانى ئەنجومەنی باڵای دەرچوانی دانەمەزراوی کورد لە شاری کەرکوک، رایگەیاند، "لە رێگەی پەرلەمانتارانی کەرکوکەوە، بەردەوام بە دواداچوون بۆ رەوشی کەرکوک دەکەن و لەسەر بابەتی ئەو ٢ هەزارو ٨٤١ پلەی دامەزراندنەی کە لە وەزارەتی پەروەردەوە، درابوویە پەروەردەی کەرکوک و پاش بەدواداچوون بۆیان دەرکەوت کە نادادپەروەری تێدا کراوە".

راشیگەیاند، نوێنەری وەزارەتی پەروەردە و بەڕێوەبەری گشتی پەروەردەی کەرکوکیان بانگهێشتی لیژنەی پەروەردەی پەرلەمان کرد
.

ئاماژەی بەوەشکرد، ئەوان داوایان لە وەزارتی پەروەردە و بەڕێوەبەری گشتی پەروەردەی کەرکوک کردووە، ئەو لیستی دامەزراندنە رابگرن و پێداچوونەوەش بەناوی ئەو کەسانەدا بکرێت کە ناویان لەناو دامەزراوەکاندا بووە، دواجار لەسەر شێوازێکی نوێ پلەکان دابەش بکرێنەوە کە هاوسەنگی پێکهاتەکان هەریەکەو بەپێی قەبارەی خۆی تێدا رەچاوبکرێت.

ئەمەش لەکاتێکدایە، لە چەند رۆژی رابردوودا دەرچوانی دانەمەزراوی کوردی زانکۆ و پەیمانگاکانی کەرکوک خۆپیشاندانیان کرد و داوای هەڵوەشاندنەوەی ئەو دامەزراندنەیان کرد کە تێیدا لە دوو هەزار و ٨٤١ پلەی دامەزراندن تەنیا ٥٠٠ پلەی بەر ئەوان کەوتووە.

هـ.ب