سەردێڕ:

لیژنەى هەموارى دەستورى عێراق: لەسەر کەمکردنەوەى ژمارەى ئەندامانى پەرلەمان رێککەوتووین

فۆتۆ: 
2020-01-19

2409 جار خوێندراوەتەوە

ئەندامێکى لیژنەى تایبەت بە هەموارى دەستورى عێراق بە دیجیتاڵ میدیاى ئێن ئاڕ تى راگەیاند، ئەندامانى لیژنەکە لەسەر زۆر بابەت رێککەوتوون، بەتایبەت لەسەر کەمکردنەوەى ژمارەى ئەندامانى پەرلەمانى عێراق.

ئەو ئەندامەى لیژنەکە رایگەیاند، کۆمەڵێک بابەتى جیاوازى تائێستاش لەبەردەم گفتوگۆدایە، و دەبێت لەلایەن هەموو لایەنەکانەوە بە تەوافقى هەمواربکرێتەوە لە ماوەیەکى دیاریکراودا، پێش کۆتایهاتنى کارى لیژنەکە لەماوەى چوار مانگدا.

وتیشى، ئەندامانى لیژنە تایبەتەکە لەسەر بەشێکى پرسەکان رێککەوتوون، لەوانە کەمکردنەوەى ژمارەى ئەندامانى پەرلەمان و هەروەها چۆنیەتى پێکهێنانى حکومەتى نوێ، لەگەڵ ئەوەشدا لیژنەکە لەبارەى دەستە سەربەخۆکان، کۆتایى بە پێداچوونەوەى پیشنیازەهەموارکراوەکان هێناوە.

ئاماژەى بەوەشکرد، لەسەر گۆڕینى ناوى دادگاى فیدراڵى رێککەوتون بکرێت بە ناوى ( دادگاى دەستورى باڵاى فیدڕاڵى).

لیژنەى تایبەت بە هەموارى دەستورى عێراق لە مانگى ١١ى ساڵى رابردووەوە دەستبەکاربوون، بۆ هەموارى نوێى دەستور بەشێوەیەک کە لەگەڵ داخوازییەکانى خۆپیشاندەراندا بگونجێت.