سەردێڕ:

شاسوار عەبدولواحید: سبەینێ رۆژی جیاکردنەوەی پەرلەمانتارە بەڕەوشت و بێڕەوشتەکانە

فۆتۆ: 
2020-01-15

6433 جار خوێندراوەتەوە

سەرۆکى جوڵانەوەى نەوەى نوێ ڕایگەیاند، سبەینێ رۆژی جیاکردنەوەی پەرلەمانتارە بەڕەوشت و خاوەن هەڵوێستەکانە لە پەرلەمانتارە بێڕەوشت و بێهەڵوێست و مشەخۆرەکان.

شاسوار عەبدولواحید سەرۆکى جوڵانەوەى نەوەى نوێ ڕایگەیاند، "ئەو پەرلەمانتارەی دەنگ دەدات بە یاسایەک کە موچەی خۆی و وەزیر و پلەباڵاکانی تر ٤٠ هێندەی موچەی کەمئەندام و فەرمانبەرانیترە، ئەوە مرۆڤێکی خۆپەرست، بەرژەوەندییخواز و مشەخۆرە و تەنها لە غەمی گیرفانی خۆیدایە پێویستە موچەی پلە باڵاکان بکرێنە نیوە و بە هیچ شێوەیەکیش کەسیان تا تەمەنی ٦٠ ساڵی خانەنشینی نەیانگرێتەوە".

ڕاشیگەیاند، "هەر حیزب و فراکسیۆنێک لە پەرلەمانتارەکانی قبوڵ بکات دەنگ بە پرۆژە یاسای لەم شێوەیە بدەن، ئەوە بێگومان ئەوانە حیزب نین، بەڵکو نووسیینگە و دوکانی پارەپەیداکردنن بۆ گیرفانی خۆیان".

ئاماژەى بەوەشکردووە، "لە هەرێم موچەی ئێستای پلە باڵایەک هەشت ملیۆن دینارە و نزمتریین موچەش ١٥٠ بۆ ٢٠٠ هەزار دینارە واتە موچەی وەزیر و پەرلەمانتار ٤٠ ئەوەندەی موچەی کەمئەندام و فەرمانبەرێکی ئاساییە".

ئەوەشى خستووەتەڕوو، "لە وڵاتێکی وەک سوید دا، موچەی پەرلەمانتارێک مانگانە شەش هەزار یۆرۆیە و کەمتریین موچەی کەسێک کە ئیش بکات لەهەر فەرمانگە و شوێنێک مانگانە دوو هەزار یۆرۆیە (واتە موچەی پلەباڵاکان تەنها سێ هێندەی موچەی فەرمانبەرێکی ئاساییە".

هەروەها، ڕاشیگەیاندووە، "ئەمە لای جوڵانەوەی نەوەی نوێ و فراکسیۆنەکەی مایەی قبوڵ نییە، ئەمە یاسای چاکسازیی نییە کە بە هیچ شێوەیەک دەستی نەبردووە بۆ موچەی پلەباڵاکان و هەروەها باسی داهاتی نەوت و زۆر بابەتی تر ناکات، بەڵکو ئەمە لای ئێمە پێیدەڵێین یاسای خراپسازیی".

ئەمەش لە کاتێکدایە، بڕیارە سبەی  پەرلەمانی کوردستان کۆببێتەوە و پڕۆژە یاسای چاکسازی بخرێتە دەنگدانەوە.