سەردێڕ:

ڤیدیۆ و دەنگی تەواوەتی گرژییەکەی ناو پەرلەمان بڵاوکرایەوە

لە نێوان فراکسیۆنی نەوەی نوێ و پارتی ڕوویدا
فۆتۆ: 
2020-01-13

35775 جار خوێندراوەتەوە

 لە ناو هۆڵی پەرلەمانی کوردستاندا گرژیی و ئاڵۆزیی لە نێوان فراکسیۆنی پارتی و نەوەی نوێ دروستبوو و بەهۆیەوە پەخشی راستەوخۆی دانیشتنەکە راگیرا.

محەمەد عامر پەیامنێری ئێن ئاڕ تی لە هەولێر ڕایگەیاند، گرژی لە نێوان پەرلەمانتارێکی نەوەی نوێ و چەند پەرلەمانتارێکی پارتی دروستبووە.

وتیشی ،گرژیی و دەمەقاڵێکە لە نێوان سیپان ئامێدی په‌رله‌مانتاری فراكسیۆنی نه‌وه‌ی نوێ و هێڤیدار ئه‌حمه‌د په‌رله‌مانتاری فراكسیۆنی پارتی  بووە و ژماره‌یه‌ك له‌ په‌رله‌مانتاران ناوبژیوانیان كردوون.

ئاماژەی بەوەشکرد، لەسەر داواکردنی نەهێشتنی خانەنشینی پلە باڵاکان، چەند پەرلەمانتارێکی پارتی پەلاماری پەرلەمانتارانی نەوەی نوێیان داوە.

هاوکات سیپان ئامێدی پەرلەمانتارى نەوەی نوێ لە پەرلەمانى کوردستان دەربارەی گرژییەکەی ناو پەرلەمان ڕایگەیاند، "پەرلەمانتارێکى فراکسیۆنى پارتی لە جێگەى خۆى هەستاو بە ئێمەى وت بێدەنگبن ، دواتر بەئاماژەى دەست هەڕەشەى لێکردین و پێی وتین من چاوى ئێوە دەردێنم، ئێمەش بێدەنگ نەبووین و منیش قەڵەمەکەى خۆم تێگرت".

راشیگەیاند، دوای ئەوەی پەخشی راستەوخۆی پەرلەمان راگیرا چەند پەرلەمانتارێکی فراکسیۆنی پارتی هێرشیان کردووەتەوە سەر ئەو و  کازم فاروق سەرۆکی فراکسیۆنەکەیان  و دەشڵێت، "جێگەی داخە پەرلەمان پەخشەکەی راگرت و نەیهێشت راستی بە خەڵک بگات چۆن فراکسیۆنەکەیان بەرگری لە مافی خەڵکی کردووە."