سەردێڕ:

کەرکوک.. دادگا داوای ١٢ ئەندامی ئەنجومەنی پارێزگا دەکات کە زۆرینەیان کوردن

هۆڵی ئەنجومەنی پارێزگای کەرکوک
فۆتۆ: ئەرشیف
2019-12-03

2755 جار خوێندراوەتەوە

بەهۆی وەرگرتنی موچە و پابەند نەبوونیان بە دەوامەوە، ١٢ ئەندامی ئەنجومەنی پارێزگای کەرکوک، کە زۆرینەیان کوردن، لە لایەن دادگاوە داوای ئامادەبوونیان دەکرێت.

 

ئەمڕۆ سێشەممە، نەجات حسێن، سەرۆکی لیژنەی دەستپاکی لە ئەنجومەنی پارێزگای کەرکوک بە ئێن ئاڕ تی ڕاگەیاند، "دوانزە ئەندامی ئەنجومەنی پارێزگای کەرکوک، لەنێویشیاندا ڕێبوار تاڵەبانی سەرۆکی ئەنجومەنی پارێزگای کەرکوک، بە بڕیاری دادگای لێکۆڵینەوەی دەستپاکی کەرکوک داوایان لێکراوە لەبەردەم دادوەر ئامادە بن".

وتیشی، "بڕیارەکە ئەو ئەندامانەی ئەنجومەنی پارێزگای تێدایە، کە ماوەی دوو ساڵە بە بێ پابەندبوون بە دەوامی فەرمییەوە مووچە و پارەی بەنزین و ئیمتیازاتەکان وەردەگرن".

ئاماژەی بەوەشدا، "ئەو ئەندامانەی ئەنجومەن بە پێی ماددەی ۳٤۰ لە یاسای سزادان لەلایەن دادگاوە فەرمانی ئامادەبوونیان بۆ دەرکراوە".

لە دوای ڕوداوەکانی ۱٦ی ئۆکتۆبەری ساڵی ٢٠١٧، بەشێک لە ئەندامانی کوردی لیستی برایەتی کەرکوک لە ئەنجومەنی پارێزگای کەرکوک، کە سەرجەمیان پارتین، نەگەڕاونەتەوە کەرکوک و بەشداری دەوام و کۆبوونەوەی ئەنجومەنی پارێزگاکە ناکەن.