سەردێڕ:

بەڵگەنامەیەك: ئێران سیخوڕی بەسەر سەلیم جبورییەوە کردووە

فۆتۆ: 
2019-11-18

4503 جار خوێندراوەتەوە

بەپێی چەند بەڵگەنامەیەك كە ئاژانسی نیویۆرك تایمز بڵاویكردووەتەوە، تاران لە ڕێگەی بەكرێگرتنی یەكێك لە ڕاوێژكارەكانی سەرۆكی پێشووی پەرلەمانی عێراقەوە بە تەواوەتی كۆنترۆڵی كاروبارەكانی سەلیم جبوری و پەرلەمانی عێراقی كردووە.

ماڵپەڕی "زە ئینتەرسێپت" چەند بەڵگەنامەیەكی دەستكەوتووە كە لە دەزگای هەواڵگریی ئێرانەوە دزەی پێ كراوە و لە ڕۆژنامەی "نیویۆرك تایمز" بڵاوكراوەتەوە، باس لەوە دەكەن ئێران لە ڕێگەی بەكرێگرتنی چەند كەسێك لەناو پەرلەمانی عێراقدا، بە وردی چاودێریی سەرجەم كاروبارەكانی سەرۆكی پەرلەمان و جموجوڵەكانی ئەو دەزگایەی عێراقی كردووە، لەناو بەكرێگیراوەكانی ئێرانیشدا گەورە ڕاوێژكارێكی سەلیم جبوری هەیە، كە كۆدی نهێنیی ئەو ڕاوێژكارە لای ئێرانییەكان "١٣٤٨٣٢" بووە و، بە تەواوی ملكەچی فەرمانەكانی تاران بووە و دەسەڵاتدارانی ئێرانی لە جموجوڵەكانی سەرۆكی پێشووی پەرلەمانی عێراق ئاگاداركردووەتەوە.

ئەو ڕاوێژكارە بەكرێگیراوە كە پلەی ئەفسەری لە سوپای عێراقیشدا هەیە وتوویەتی، ڕۆژانە لە نوسینگەی سەرۆكی پێشووی پەرلەمان دەوامی كردووە و، ئێرانی لە پەیوەندییە تەلەفۆنییەكانی جبوری ئاگاداركردووەتەوە، بەتایبەتی ئەو پەیوەندییانەی كە سەلیم جبوری لەگەڵ ئەمریكییەكان ئەنجامیداوە.

لای خۆشییەوە سەلیم جبوری ڕەتیكردەوە هیچ یەك لە ڕاوێژكارەكانی سیخوڕییان بۆ دەوڵەتی ئێران كردبێت و دەڵیت، متمانەی تەواوی بەو كەسانە هەیە كە كاریان لەگەڵ كردووە.

هەر بەپێی ئەو بەڵگەنامانە، ئەو بەكرێگیراوە دەسەڵاتدارانی ئێرانی هانداوە پەیوەندییەكانیان لەگەڵ سەلیم جبوری بەهێزتر بكەن بۆ ڕێگرتن لە هەژموونی ئەمریكا بەسەر سوننەكانی عێراقەوە.