سەردێڕ:

پۆتن: پێویستە گفتوگۆی نێوان حکومەتی سوریا و کوردەکان بەهێز بکرێت

فۆتۆ: 
2019-10-22

6114 جار خوێندراوەتەوە

 ڤلادیمێر پۆتنی سەرۆکى ڕوسیا ڕایگەیاند، پێویستە گفتوگۆی نێوان حکومەتی سوریا و کوردەکان بەهێز بکرێت. 

ڤلادیمێر پۆتن سەرۆکى ڕوسیا پاش کۆبوونەوەى لەگەڵ رەجەب تەیب ئەردۆغان سەرۆکى تورکیا ڕایگەیاند، پێویستە گفتوگۆی نێوان حکومەتی سوریا و کوردەکان بەهێز بکرێت، پێویستیشە سەربازی بیانی لەسەر خاکی سووریا نەمێنیت.

راشیگەیاند، "پێویستە ڕێگە بگیرێت لە سوودوەرگرتنی تیرۆرستەکان لە دۆخی ئێستاى سوریا."

ئاماژەى بەوەش کرد، لەگەڵ تورکیا ڕێککەوتوین لە هەردوو وڵات کار بە دراوی نیشتمانیی هەردوو وڵاتەکە بکرێت.

هاوكات، سەرۆك كۆماری توركیاش لای خۆیەوە ئەوەى خستەڕوو، "ئێمە چاومان لە خاكی سوریا نییە و ئامانجی ئۆپراسیۆنەكەمان بۆ ئاسایشی وڵاتەكەمان بووە."

ئەردۆغان ڕاشیگەیاند، "ئێمە سەرەتا لە ناوچەی ئارامدا یەك ملیۆن ئاوارە نیشتەجێ دەكەین."

 هاوکات سێرگى لاڤرۆڤ وەزیرى دەرەوەى ڕوسیاش ڕایگەیاند، میکانیزمێکی هاوبەش بۆ ڕێککەوتنی ڕوسیا و تورکیا لە باکوری سوریا دادەنرێت و چەند یەکەکی سەربازیی دەچنە باکوری سوریا بۆ دڵنیابوونەوە لە پاشەکشەی هێزە کوردییەکان و تورکیاش بەڵێنی داوە پارێزگاری لە دۆخی ئێستای ناوچەکە بکات و گرنگترین شت پارێزگاریکردنە لە ڕێککەوتنی ئەدەنە.

ئەمڕۆ ئەردۆغان لەسەر بانگهێشتی پۆتن سەردانی روسیای کرد، دیدارەکەیان لەکاتێکدایە کە چەند کاتژمێرێکی ماوە بۆ کۆتاییهاتنی ئاگربەست لە باکوری سوریا، کە هەفتەی رابردوو لە نێوان تورکیا و ئەمریکا راگەیەندرا.

هاوکات،بەپێى رێکەوتنى ئەدەنە کە لە ساڵى ١٩٩٨لە نێوان حکومەتى سوریا و حکومەتى تورکیا ئیمزاکراوە رێگەدەدرێت بە سوپاى تورکیا پێنج کیلۆمەتر بچێتە ناو خاکى سوریا لەحاڵەتى هەر مەترسیەک لەسەر تورکیا.