سەردێڕ:

نەوەی نوێ: لە بری هەڵوێستی میدیایی با سنورەکانمان بۆ خەڵکی رۆژئاوا بکەینەوە

فۆتۆ: 
2019-10-10

1835 جار خوێندراوەتەوە

جوڵانەوەی نەوەی نوێ ئەمڕۆ پێنج شەممە ١٠ی تشرینی یەکەمی ٢٠١٩، بەیاننامەیەکی تایبەت بە هێرشەکانی سوپای تورکیا بۆ سەر رۆژئاوای کوردستان بڵاوکردەوە و داوا لە حکومەت و پەرلەمانی کوردستان دەکات بەرپرسیارانە مامەڵە لەگەڵ ئەم پێشهاتە نوێیەدا بکەن.

نەوەی نوێ ئەوەشیان وتووە، لە بری هەڵویستی لاستیکی و میدیایی، با سنورەکان بکرێنەوە بۆ خەڵکی رۆژئاوای کوردستان و ئازوقەیان بۆ بنێردرێت.

هەر لە بەیاننامەکەدا هاتووە، "پێویستە پەرلەمان هەڵوێستی روون و ئاشکرایان هەبێت و دەستبەجێ هاوکاری و پشتیوانی و هەنگاوی کردەیی پێشکەش بکرێت لە دابینکردنی ئازوقەوە تا کردنەوەی سنوورەکان بەڕووی خەڵکی رۆژئاوادا".

لە بەیاننامەکەدا ئاماژە بەوە کراوە، ئەو هێرشانە دەستدرێژیی و هەڕەشەیەکی مەترسیدارن بۆ سەر ئاسایشی ناوچەکە و جیهان"

هاوکات وتوشیانە، "ئەم هێرشانە ئەزمونی رۆژئاوا و تەنانەت هەرێمی کوردستان و عێراقیشی خستووەتە دووریانێکی مەترسیدارەوە"

دەشڵێن، "ڕوومان لە حکومەت و پارلەمانە، بەرپرسیارانە مامەڵە لەگەڵ ئەم پێشهاتە نوێیەدا بکەن".

هەر لە بەیاننامەکەدا هاتووە، "پێویستە هێز و لایەنەکان کۆبوونەوەیەکی بەپەلە ئەنجام بدەن بۆ وەرگرتنی هەڵوێستێکی نیشتیمانییانەی بوێرانە".

ئەمەش دوای ئەوە دێت کە ئەمریکا هێزەکانی خۆی لەسەر سنوری سوریا-تورکیا کشاندەوە، لە دوێنێ ئێوارەوە هێرشی تورکیا دەستی پێکردووە، هەرچەندە ڕوون نییە ژمارەی کوژراوان چەندن، بەڵام بەپێی ئەو زانیارییانەی دەست ئێن ئار تی کەوتووە، لانی کەم ٣ شەڕڤان و دەیان هاوڵاتی مەدەنی شەهیدبوون و هەسەدەش ڕایگەیاندووە لەھێرشەکانی دوێنێدا پێنج سەربازی تورکیا کوژراون و چوار تانکی سوپای تورکیایان لەسنوری گرێ سپی تێکشکاندووە. وەزارەتی بەرگری تورکیاش ڕایگەیاندووە، لەدوێنێوە چەند ناوچەیەکمان کۆنترۆڵ کردووە و پێشڕەویمان بەردەوامە. سەرلەبەیانی ئەمرۆش هەسەدە ڕایگەیاند کە هێشتا بۆردومانکردنی شاری سەرێکانی لەلایەن تورکیاوە بەردەوامە.