سەردێڕ:

کەرکوک.. حیزبە کوردستانییەکان جگە لە نەوەى نوێ بە یەک لیست بەشداری هەڵبژاردن دەکەن

فۆتۆ: 
2019-09-09

4395 جار خوێندراوەتەوە

حیزبە کوردستانییەکانى کەرکوک جگە لە نەوەى نوێ بڕیاریاندا بە یەک لیست بەشداری هەڵبژاردن دەکەن و ناوی لیستەکەشیان "کەرکوک کوردستانییە".

لە کۆنگرەیەکى ڕۆژنامەوانیدا شێخ سدیق ئەحمەد بەرپرسی کۆمیتەی حیزبی شیوعی لە کەرکوک رایگەیاند، ئەمڕۆ دووشەممە ٩ى ئەیلولى ٢٠١٩ حزبە کوردستانییەکان لەسەر ئاستی باڵا لە کەرکوک کۆبوونەوە و بڕیاریانداوە بە یەک لیست بەشدارى هەڵبژاردنی ئەنجوومەنی پارێزگای کەرکووک بکەن کە بڕیارە لە نیسانى ساڵى داهاتوودا بکرێت.

لە کۆبوونەوەکەدا جەختکرایەوە لە هەموارکردنەوەی یاسای هەڵبژاردنی ئەنجوومەنی پارێزگاکان.

هاوکات نوێنەرى یەکەمى حزبەکان داوالە ئەنجوومەنی پارێزگای کەرکووک دەکەن لە نزیکترین دەرفەتدا کۆبوونەوەی ئاسایی خۆی بکات و کاندیدی لیستی برایەتی وەک پارێزگاری کەرکوک دیارى بکات.

داواش لە خەڵکى کەرکوک بە تایبەت کورد دەکەن سەردانی ناوەندەکانی تۆماری بایۆمەتری بکەن و کارتی دەنگدان دەربکەن.

هەرچەندە نوینەرى پارتى دیموکراتى کوردستان لە کۆبونەوەکەى ئەمڕۆى کەرکوک بەشدار نەبووە و پێدەچێت لە ڕۆژانى ئایندەدا هەڵوێستى خۆى لەوبارەوە ڕابگەیەنێت، چونکە پارتى پیشتر مەرجى ئاساییکردنەوەى دۆخى کەرکوکى هەبووە بۆ بەشداریکردن لە هەڵبژاردنى ئەنجومەنى پارێزگاى کەرکوک و هۆشداریشى دابوو ئەگەر بەم دۆخەى ئێستاوە هەڵبژاردن بکرێ کورد زەرەرمەند دەبێت.

لە دواى ڕوخانى بەعس لە ٢٠٠٣وە تەنها یەک جار کەرکوک بەشدارى هەڵبژاردنى ئەنجومەنى پارێزگاکانى عێراقى کردووە، کە لە ساڵى ٢٠٠٥بووە و  تائیستاش بەهۆى ململانێ و ناکۆکى پێکهاتەکانى شارەکەوە نەتوانراوە لەسەر یاسایەک رێکبکەون تا هەڵبژاردن لەو شارە بکرێت.