سەردێڕ:

ئێران.. بەهۆی کاردانەوەکان گرێبەستی هاوسەرگیری منداڵێکی نۆ ساڵان هەڵوەشێنرایەوە

فۆتۆ: 
2019-09-03

26660 جار خوێندراوەتەوە

دوابەدوای بڵاوبوونەوەی ڤیدیۆی مارەبڕینی کچێکی تەمەن نۆ ساڵ لە پارێزگای کۆهکیلویە و بویەرئەحمەدی ئێران و دروستبوونی ناڕەزایەتی لەو بارەوە، دەسەڵاتی دادوەری گرێبەستەکەی هەڵوەشاندەوە.

لەو گرتە ڤیدیۆییەی بڵاوکراوەتەوە، ئەو کچە منداڵە لە کەسێکی تەمەن ٢٢ ساڵ مارە دەکرێت و دوابەدوای بڵاوبوونەوەی ڤیدیۆکەش لە تۆڕە کۆمەڵایەتیەکان، چالاکانی داکۆککیکار لە مافی منداڵان ناڕەزایەتی زۆریان دەربڕی.

بەهۆی ئەو ناڕەزایەتیانە حەسەن نگین تاجی سەرۆکی گشتی دادگای کۆهکیلویە و بویەر ئەحمەد رایگەیاند، ئەو گرێبەستە هاوسەرگیریەیان هەڵوەشاندووەتەوە رێکاری یاساییان بەرامبەر بە زاوا، بەخێوکەری منداڵەکەی و ئەو کەسەی مارەبڕینەکەی بەڕێوەبردووە، گرتۆتە بەر.

بەپێی یاساکانی ئێران کچان لە خوار تەمەنی ١٣ ساڵ و کوڕانیش لە خوار تەمەنی ١٥ بۆیان نییە هاوسەرگیری بکەن.

ساڵی رابردوو ژمارەیەک لە پەرلەمانتارانی ئێرانی پڕۆژەیەکیان پێشکەش کرد بەمەبەستی بەرزکردنەوەی تەمەنی هاوسەرگیری کچان لە ١٣ ساڵەوە بۆ ١٦ ساڵ، بەڵام لیژنەی یاسایی پەرلەمان پڕۆژەکەیانی رەتکردەوە.

بەپێی ئامارێکی بەڕێوبەرایەتی گشتی رەگەزنامە و ناسنامەی باری کەسێتی ئێران ساڵانە نزیکەی ٤٠ هەزار هاوسەرگیری مێرمنداڵانی خوار تەمەنی ١٤ ساڵ لە ئێران تۆمار دەکرێن.