سەردێڕ:

سکاڵا لەسەر وەزیرى دارایى عێراق تۆمارکرا

فۆتۆ: 
2019-07-22

32839 جار خوێندراوەتەوە

لەسەر ناردنى شایستە داراییەکانى هەرێمى کوردستان سکاڵا لەسەر وەزیرى دارایى عێراق تۆمارکرا.

بەپێى ئەو نوسراوەى دەست دیجیتاڵ میدیاى ئێن ئاڕ تى کەوتووە، هەردوو پەرلەمانتار جەودا موسەوى و ئەنعام خوزاعى کە سەر بە لیستی سائیرونن، ئەمڕۆ بە فەرمى سکاڵایان لەسەر فوئاد حوسێن وەزیرى دارایى عێراق لە دادگاى فیدراڵى تۆمارکرد.

بەپێى نوسراوەکە، سکاڵاکە بۆ ئەوەیە کە وەزیرى دارایى پێچەوانەى بڕیارێکى یاساى بودجەى گشتیى عێراق کارى کردووە، کە لە بەرانبەر ناردنى بەشە بودجەى هەرێم دەبێت ٢٥٠ هەزار بەرمیل نەوتى ڕۆژانە ڕادەستى کۆمپانیاى سۆمۆ بکرێت.

بەپێی یاسای بودجەی ٢٠١٩ی عێراق، دەبێت حکومەتی هەرێم ڕۆژانە ٢٥٠ هەزار بەرمیل نەوت ڕادەستی سۆمۆ بکات، لەگەڵ ئەوەی زیاتر لە مانگێکە یاساکە پەسەندکراوە و دەستکراوە بە جێبەجێکردنی، بەڵام لە دوو مانگی ڕابردوودا هەرێم نەوتی ڕادەستی کۆمپانیای سۆمۆ نەکردووە و بە سەربەخۆ نەوت دەفرۆشێت، ئەوەش مەترسی ئەوەی دروستکردووە کە بەغدا جارێکی دیکە هەوڵی بڕینی بەشە بودجەی هەرێم بدات.

لە یاسای بودجەی ٢٠١٩ دا پشكی هەرێم بە ١٢.٦٧% دیاریکراوە و بەپێی یاساکەش، ئەگەر هەرێم پابەند نەبێت بەوەی نەوت ڕادەستی کۆمپانیای سۆمۆ بکات، ئەوا بەغدا مانگانە تەنها ٥٢٢ ملیار دینار بۆ هەرێمی کوردستان دەنێرێت، بۆ موچەی فەرمانبەران و هێزەکانی پێشمەرگەیە، ئەگەر نەوتیش ڕادەستی بەغدا بکات ئەوە کۆی ئەو بڕە پارەیەی بەپێی بودجە دەدرێتە هەرێم لەمساڵدا زیاترە لە نۆ ترلیۆن دینار.

ب.ب