سەردێڕ:

حکومەتى هەرێم لەسەر دەستگیرکردنى چەند گەشتیارێکى کورد لە تورکیا هاتەدەنگ

ئەو گەشتیارانەى بەئاڵاى کوردستانەوە لە تورکیا وێنەیان گرتبوو
فۆتۆ: 
2019-07-19

30239 جار خوێندراوەتەوە

حکومەتى هەرێم نیگەرانى خۆی لە دەستگیرکردنى چەند گەشتیارێکى کورد لە تورکیا دەربڕی و داوایکرد، بە زووترین کات گەشتیارانی هەرێمی کوردستان ئازاد بکرێن.

حکومەتى هەرێم لەراگەیەندراوێکدا ئاماژەى بەوەکردووە، "لە چەند رۆژی رابردوودا چەند هاوڵاتییەکی هەرێمی کوردستان لە شاری ترابزۆنی تورکیا، تووشی پەلاماردان و دەستدرێژیی بوونەوە بە هۆی ئەوەی ویستوویانە بە ئاڵای کوردستانەوە وێنە بگرن، دواتر دەستگیرکراون و بە نیازن بیاندەنە دادگا".

روونیشیکردووەتەوە، "ئاشکرایە ئاڵای ھەرێمی کوردستان، ئاڵایەکی دەستوورییە لە ناو عێراقدا و پێشتریش لە فڕۆکەخانەکان و ھۆڵەکانی پێشوازی لە تورکیا دانراوە بۆ پێشوازیکردن لە شاندەکانی ھەرێمی کوردستان."

باس لەوەشکراوە، " سەرۆکی حکومەتی هەرێم وێڕای دەربڕینی نیگەرانی لەو رووداوە، لایەنە پەیوەندیدارەکانی هەرێمی کوردستانیشی راسپارد کە لەگەڵ بەرپرسانی تورکیا قسە بکەن، تا بە زووترین کات گەشتیارانی هەرێمی کوردستان ئازاد بکرێن."

ئەوەش لەکاتێکدایە پێشتر لە تۆڕە کۆمەڵایەتییەکاندا ڤیدیۆیەک بڵاوکرایەوە كە چەند گەشتیارێک لە شارى ترابزۆنى تورکیاوە لەکاتى وێنەگرتنیان بە ئاڵاى کوردستانەوە پەلاماردران و دواتر دەستگیرکران.