سەردێڕ:

پارێزگاری سلێمانی وەڵامى غالب محەمەدى دایەوە

فۆتۆ: 
2019-07-15

7078 جار خوێندراوەتەوە

پارێزگاری سلێمانی ئەو تۆمەتانەى غالب محەمەدى ڕەتکردەوە لە بارەى بەهەدەردانی سووتەمەنی بۆ پارێزگاکە و ڕاشیگەیاند، هەر کەسێک ئامار و داتای وردی دەوێت دەیخەنە بەردەستی، بەمەرجێك بۆ موزایەدەی سیاسی بەكارنەهێنرێت.

هەڤاڵ ئەبوبەكر، پارێزگاری سلێمانی (ئەمڕۆ ١٥ی تەمموزی ٢٠١٩) لە سیمیناری پاراستنی سامانی ئاو لەشاری سلێمانی، وەڵامی قسەكانی غالب محەمەد، پەرلەمانتاری گۆڕان لەپەرلەمانی عێراق دایەوە و دەڵێت، "یەك لیتر بەهەدەر نەدراوە و دەبێت سوپاس بكرێین، نەك سوكایەتی بەئیشەكانمان بكرێت".

ڕاشیگەیاند، هیچ بڕە نەوتێك بۆ ئاوارەكان نەهاتووە، "ئێمە لەوەرزی زستاندا نەوتمان بۆ كڕیون، لەسەر بودجەی خۆمان نەوتمان بۆ زیانلێكەوتووانی لافاوەكانی بناری قەندیل و دۆڵی شاورێ و باڵەكایەتی كڕیوە".

وتیشى، قسەكانی غالب محەمەد وەك رای تایبەتی سەیر دەكەن، چونكە نە فراكسیۆنەكەی و نە فراكسیۆنە كوردییەكان و نە لیژنەی سووتەمەنی پەرلەمانی عێراق و نە حكومەتی عێراقی لەگەڵیدا نەبوون.

هەڤاڵ ئەبوبەكر ئاماژەی بەوەشكرد، "ئەو بڕە سووتەمەنییە زۆر كەمە كە دەدرێتە فەرمانگەکانیان و بەشانازییەوە یەك لیترمان بەهەدەرنەداوە و ئاگامان لێیەتی، لەپێنج ساڵی رابردوودا یەك لیتر نەوت لەسلێمانی دابەش نەكراوە، ئەوە ئێمەین كە نەوتمان دابەشكردووە".

سەبارەت بە پارێزگای هەڵەبجە پارێزگارى سلێمانى وتى،" ئەو پەرلەمانتارە دەڵێت، نەوت دابەش نەكراوە، خەڵك سێ بەرمیلی وەرگرتووە و شوێنەكانی دیكەش دابەشكراون ".

پارێزگاری سلێمانی وتیشی: "هەر بەڕێزێك ئامار و داتای وردی دەوێت دەیخەینە بەردەستی، بەمەرجێك ئەو داتایانە بۆ موزایەدەی سیاسی بەكار نەهێنرێت".

ب.ب