سەردێڕ:

غالب محەمەد: دەیان ملیۆن لیتر سوتەمەنى بۆ هەرێم هاتووە و دابەشنەکراوە

فۆتۆ: 
2019-07-14

10768 جار خوێندراوەتەوە

پەرلەمانتارێکى کورد لە پەرلەمانى عێراق رایگەیاند، لەساڵى ٢٠١٨ دا  دەیان ملیۆن لیتر سوتەمەنى لە بەغداوە بۆ هەرێم نێردراوە، بەڵام بەسەر هاوڵاتییاندا دابەشنەکراوە.

ئەمڕۆ یەکشەممە غالب محەمەد لە کۆنفڕانسێکى رۆژنامەنووسیدا ئاماژەى بەوەکرد، لە ساڵى رابردوودا ٤٤ ملیۆن و ٩٦١ هەزار لیتر نەوتى سپی بۆ پارێزگاى سلێمانى هاتووە و دەبوو نیوەى پارێزگاى سلێمانى وەریبگرێت، بەڵام زۆربەى هاوڵاتییان نەوتیان وەرنەگرتووە و لەو بڕە تەنها ٢٧ ملیۆن لیترى دابەشکراوە.

ئاماژەى بەوەشکردووە، هەر لە ساڵى رابردوودا بەغدا ٢٩ ملیۆن و ٦٢٨ لیتر نەوتى سپی بۆ پارێزگاى هەولێر ناردووە، بەڵام دابەشنەکراوە بەسەر هاوڵاتییانى شارەکە.

هاوکات ئەوەشى ئاشکراکردووە، جگە لە نەوتى سپی، بەناوى کۆچبەرانەوە دەیان ملیۆن لیتر بەنزین و گاز بە ناوى کۆچبەرانەوە بۆ پارێزگاکانى هەرێم نێردراوە، بەڵام بەپێی بەدواداچوونەکانیان نوسینگەى کۆچبەران ئەو بەنزینەیان بۆ نەچووە و لەڕێگەى پارێزگاکانەوە دراوە بە دامودەزگاکانى حکومەت.

ئەو پەرلەمانتارەى عێراق وتیشی، حکومەت نەوتەکەى هەرزانفرۆش دەکات و ئەو سوتەمەنییەشى لە بەغداوە دێت نایداتە هاوڵاتییان و مۆلیدە ئەهلییەکانیش لەدەرەوە سوتەمەنى دەکڕن، کە ئەوەش دەبێتە بارگرانى لەسەر هاوڵاتییان.

ئ.ر