سەردێڕ:

بەغدا.. ژمارەیەک پارێزەر سکاڵا دژی دابەشنەکردنی مووچەی فەرمانبەرانی هەرێم تۆماردەکەن

فۆتۆ: 
2019-07-12

8146 جار خوێندراوەتەوە

ژمارەیەک پارێزەرى خۆبەش لەبانگەوازێکدا داوا لەسەرجەم فەرمانبەرانى هەرێم دەکەن، بۆ یەکلاکردنەوەى چارەنووسى ئەو سێ موچەیەى فەمانبەرانى هەرێم کە لە شەش مانگی ڕابردوودا خەرج نەکراوە، بریکارنامەیان بۆ پڕبکەنەوە تا لە دادگاى باڵاى فیدڕاڵى عێراق بیکەنە سکاڵایەک و لەو رێگەیەوە مافى تەواویان بۆ بگێڕنەوە.

حاکم شێخ لەتیف پسپۆڕى یاسایى بە ئێن ئاڕ تى ڕاگەیاند، هەتا ٢٠ى ئەم مانگە بوار هەیە فەمانبەرانى هەرێم بچن لە دادگاکان بریکارنامە بۆ ئەو پارێزەرانە پڕبکەنەوە، بۆئەوەى لەڕۆژانى داهاتوودا بکرێتە سکاڵایەک و لەدادگاى فیدڕاڵى بەرزبکرێتەوە.

ئاماژەى بەوەشکرد، بۆ بەهێزى سکاڵاکە گرنگە کە زۆرترین ژمارەى فەرمانبەر ئەو بریکارنامەیە بکەنەوە و بەگرنگیەوە پێشوازى لەم هەوڵەى  ئەو تیمە پارێزەرانە بکەن هەتا لە بەغداد بتوانن مافى تەواویان بۆ بگێڕنەوە.

بەپێى زانیاریەکان سکاڵاکە لەسەر هەریەکە لە وەزیرى دارایى عێراق و وەزیرى دارایى هەرێمە و دواتر دادگاى فیدراڵى بەپێى دۆکیۆمێنت و بەڵگەنامەکانى هەردوولا بڕیار لەسەر لایەنى کەمتەرخەم دەدات.

دادگاى باڵاى فیدڕاڵى دادگایەکى باڵاى بێلایەنە و لەدواى پرۆسەى ئازادى عێراقەوە پێکهینراوە و ژمارەیەک دادوەر لە هەرسێ پێکهاتەى کورد و سوننە و شیعە بەڕێوەیدەبەن و بڕیارەکانى هێزى جێبەجێکردنیان هەیە و وابەستەنەبوویش بە بڕیارەکانى بە تاوان هەژمار دەکرێت.

ئێستا کە مانگى تەموزە حکومەتى هەرێم سەرقاڵە بە خەرجکردنى موچەى مانگى نیسانەوە، لەکاتێکدا بەرپرسانى عێراق جەخت لەسەر ئەوە دەکەنەوە، کە لەسەرەتای ئەمساڵەوە هەموو مانگێک بەغدا موچەى فەرمانبەرانى هەرێمى لەوادەى خۆیدا ناردووە، بەم پێەیەش چارەنووسى چەند موچەیەک لەنێوان هەرێم بەغدا بەنادیارى ماوەتەوە و هەر لایەک لاکەى بەرامبەر تۆمەتباردەکات.

پێشتریش بەشێک لە پەرلەمانتارانى عێراق ئاماژەیان بەوەکردبوو، کە هەرێم مانگانە بەشە مووچەى خۆیى  بۆ نیردراوە کە ٥٢٢ ملیار دینارە، بەڵام هەرێم ئەو چەند موچەیەى کە دابەشى نەکردووە بۆ قەرزى کۆمپانیاکانى نەوت خەرجى کردووە.

بەپێى مادەى ١٠ ش لە پرۆژەیاساى بودجەى ٢٠١٩، دەبێت مانگانە حکومەتى عێراق بەشە موچەى فەرمانبەرانى هەرێم لەوادەى خۆیدا بنیرێت، ئەو پارێزەرانەش دەیانەوێت لەڕێگەى سکاڵاکەیانەوە ئەو لایەنە ناچاربکەن بەخەرجکردنى موچەکان کە هۆکاربوون لە دەستبەرداگرتنى مافى موچەخۆران.

ئێن ئاڕ تى زانیویەتى قۆناغى دووەمى کارى ئەو تیمە پارێزەرە خۆبەخشە، بەرزرکردنەوەى سکاڵاى سزاییە لەسەر لایەنى کەمتەرخەم، کە بەوتەى پسپۆڕێکى یاسایى ئەگەر دەرکەوت کە وەزیرى دارایى هەرێم یان وەزیرى دارایى عێراق کەمتەرخەمن لە خەرجنەکردنى موچەکان، ئەوا دەبێت لایەنى کەمتەرخەم بەزووى پابەندی بڕیارەکانى دادگاى فیدراڵى بێت و لەحاڵەتى وابەستە نەبوویش بە بڕیارەکەوە دەستگیردەکرێت.