سەردێڕ:

مەڵبەندی یەکێتی لە گەرمیان هۆشداریی توند بە سەرکردایەتییەکەی دەدات

سەبارەت بە ناعەدالەتی و بردنی داهاتی نەوت
فۆتۆ: 
2019-07-10

64013 جار خوێندراوەتەوە

مەڵبەندی ١١ی رێكخستنی گەرمیانی یەكێتی نیشتیمانی كوردستان هۆشداری توندی دایە سەركردایەتی حزبەكەی و ئاماژە بە ناڕەزایی زۆری هاوڵاتیان دەدەن لە گەرمیان بەهۆی ناعەدالەتی و بردنی نەوت و سامانی ناوچەكە.

لە یاداشتێكدا کە وێنەیەکی دەست دیجیتاڵ میدیای ئین ئار تی کەوتووە و ئاراستەی  جێگرانی سكرتێری گشتی و ئەنجومەنی سەركردایەتی حزبەکە کراوە، مەڵبەندی ١١ی گەرمیانی یەكێتی ئاماژەی بەوە کردووە  "گەرمیان قەڵای سەوزی یەكێتی بوو، بەڵام لە ئێستادا ئەم قەڵایە نەك هەر سەوز نیە ئەگەر فریای نەكەوین دەبێتە بەشێك لە مێژوو"

لە و یاداشتەكەدا كە تەواوی ئەندامانی ئەنجومەنی مەڵبەندی یەكێتی واژویان كردووە، تیایدا هاتووە" نەوت و كۆمپانیاكانی نەوت لە گەرمیان گومانی گەورەی درووست كردووە، لە گەرمیاندا ( ٢ هەزارو ٧٥٤ ) تەنكەر نەوت هەناردە دەكەن و داهاتی مانگانەیان ( ٤٠٠ ملیۆن و ٤٠ هەزار دینار) داهاتی كۆمپانیای دڵنیایی جۆری ( ٥ ملیار و ٧٦٠ ملیۆن دینار بووە"

لە بەشێکی دیکەی یاداشتەكەدا ئاماژە بەوە کراوە کە ناڕەزایی خۆیان دەردەبڕن لە دژی ئیدارەی گشتی چونکە " لە ٢٠١٩ دا پێنج پرۆژەی وەبەرهێنان لە بواری خانوبەرەدا دراون كە ٨%ی دراوە بە ئیدارەی گشتی یەكێتی، لە كاتێكدا كۆمپانیا هەیە ئامادەیە ٥٠% بدات بە ئیدارەی گشتی"

سەبارەت بە دابەشکردنی پۆست و بەرکەوتەکانی یەکێتی لە بەغدا هەرێم لە یاداشتەکەدا ڕوونکراوەتەوە " لەكۆی ٧٠ پۆست لەعێراق كە پشكی یەكێتیە و ١٤٠ پۆستی هەرێم  پشكی یەكێتی هیچ پۆستێك بۆ ناوچەی گەرمیان دانەنراوە"

بەپێی یاداشتەكەی مەڵبەندی گەرمیانی یەكێتی و ئۆرگانەكانی زیاتر لە ( ١٦٤ ملیۆن دینار) قەرزارن و بە ٤٥ رۆژ جارێك تەنها ٤ ملیۆن دینار دەنێرێت بۆ مەڵبەند.

لە کۆتایی یاداشتەکەدا هۆشداری ئەوە دراوەتە سەرکردایەتی یەکێتی کە ڕۆژ بە ڕۆژ بازنەی ناڕەزایەتییەکان فروانتر دەبێت و نەوت بووەتە لەعنەت و وەک خەڵکی ناوچەکە دەڵێن "دوکەڵەکەی بۆ ئێمەیە و قازانجەکەشی بۆ خەڵکی تر".