سەردێڕ:

ئەنجومەنی ئاسایشی هەرێم: هیچ پەیوەندییەکمان بە کوشتنى سەرکردەکەى پەکەکەوە نییە

فۆتۆ: 
2019-07-09

9602 جار خوێندراوەتەوە

ئەنجومەنی ئاسایشی هەرێم وەڵامی پەکەکەی دایەوە و ڕایگەیاند، دەنگۆی تێوەگلانی دەزگاکانى هەرێم لە کوشتنى سەرکردەیەکى پەکەکەدا دوورە لە ڕاستییەوە و " هیچ پەیوەندییەکمان بە کوشتنى سەرکردەکەى پەکەکەوە نییە".

 ئەنجومەنی ئاسایشی هەرێم لە ڕاگەیەندراوێکدا ڕایگەیاندووە، "لە چەند رۆژی ڕابردوودا، هەندێ میدیای نزیک لە پەکەکە، تۆمەتێکی ناڕەوایان خستووەتە پاڵ دەزگا ئەمنییەکانی هەرێمی کوردستان، کە گوایە لە کوشتنی سەرکردەیەکیان تێوەگڵاون، بەداخەوە چەند دەزگایەکی ڕاگەیاندنی نێوخۆییش بۆ سودی سیاسی پەرەیان بەم تۆمەتە بێبنەمایە داوە".

ئەوەشی تێدا هاتووە "ئێمە لە ئەنجومەنی ئاسایشی هەرێمی کوردستان، سەرلەبەری ئەم تۆمەتە ڕەتدەکەینەوە. وێڕای ئەمەش ئەم هەوڵە میدیاییە چەواشەکارانە ناتوانن ئەو ڕاستییە بشارنەوە، کە بوونی پەکەکە بەم شێوازەی ئێستایان لە هەندێ ناوچەی هەرێمی کوردستان هۆکارێکی سەرەکییە، بۆ ڕاکێشانی شەڕ و نائارامی بۆ ناو هەرێم. چەندین ساڵەش رێگرن لە ئاوەدانکردنەوەی زیاتر لە هەشت سەد گوند و ئاوایی هەرێمی کوردستان. بەداخەوە بەم دواییانەش چەکدارانی پەکەکە خۆیان خستۆتە پەنای گوند و ئاواییەکانمان و بەم هۆیەشەوە هاوڵاتیانی سڤیلمان بوونەتە قوربانیی پێکدادانی نێوان ‌پەکەکە و تورکیا".

ئاماژە بەوەشکراوە، لێرەدا جارێکی دیکەش دووپاتی دەکەینەوە کە کۆی سیستەمی ئیداریی هەرێم کە بەرپرسیارە لە پاراستنی ئاسایشی هاوڵاتیانی، دژی ئەم سیاسەتەی پەکەکەیە و خوازیارین کێشەکەیان بگوازنەوە بۆ گۆڕەپانی ڕاستەقینەی خۆیان و ئەو ڕاستییە دەخەینەوە ڕوو کە کوردستانێکی ئازاد پێویستیی بە ئازادکردن نیە.

لە کۆتایدا ئەوەشی تێدا هاتووە، دەبێت هەموولایەک ڕێز لە سەروەریی هەرێم و دامەزراوە شەرعییەکانی بگرن و ڕەچاوی بەرژەوەندیی هاوڵاتیانی هەرێم بکەن. هاوکات خوازیارین هەموو هێزەکانی ناوچەکە ڕێگەی ئاشتیانە و گفتوگۆ بگرنەبەر و کۆتایی بە خوێنڕشتن بهێنرێت.

 ئەمەش لە دوای ئەوە هات، پەکەکە دەزگاکانی باشوری کوردستانی بە هاوکاری تورکیا  لە کوشتنى دیار غەریب سەرکردەى دیاری پەکەکە تۆمەتبارکردبووە کە هەفتەی پێشوو لە چیای کورتەک لەلایەن فڕۆکەکانی تورکیاوە شەهید کرا.

 

‌بەپەلە