سەردێڕ:

ناوی کاندیدە یەکلاییکراوەکانی گۆڕان ئاشکراکران

ئەمڕۆ ڕادەستى مەسرور بارزانی دەکەن
فۆتۆ: 
2019-07-07

16485 جار خوێندراوەتەوە

ناوی کاندیدە یەکلاییکراوەکانی گۆڕان ئاشکراکران و وا بڕیارە ئەمڕۆ ڕادەستى مەسرور بارزانی  بکرێن.

سەرچاوەیەکی بزوتنەوەی گۆڕان  بە ئێن ئاڕ تی ڕاگەیاند، مستەفای سەید قادر بۆ پۆستی جێگری سەرۆكی هەرێمی كوردستان یەکلاییکراوەتەوە.

ئەو سەرچاوەیە ڕاشیگەیاند، هەریەک لە ئاواتی شێخ جەناب بۆ پۆستی وەزیری دارایی و ئابوری  و كوێستان محەمەد بۆ پۆستی وەزیری كار و كاروباری كۆمەڵایەتی و كەمال موسلیم  بۆ پۆستی وەزیری بازرگانی و دانا عەبدولکەریم بۆ پۆستی وەزیری ئاوەدانکردنەوە یەکلاییکراونەتەوە.

ئەمڕۆش هێمن شێخانى ئەندامى جڤاتى نیشتمانی گۆڕان بە ئێن ئاڕ تى ڕاگەیاند، دواى ئەوەى جڤاتى نیشتمانى یەکلاکردنەوەى کاندیدەکانى ئاراستەى ڕێکخەرى گشتى کرد، لە ئێستادا تەواوى کاندیدى پۆستەکان یەکلایى کراونەتەوە.

ڕۆژی هەینی جڤاتی نیشتمانی بزووتنەوەی گۆڕان کۆبووەوە و دواتر عومەری سەید عەلی سەرپشککرا لە یەکلایی کردنەوەی ئەو کەسانەی سیڤیان پڕکردبووەوە بۆ وەرگرتنی پۆستەکان.

بزوتنەوەی گۆڕان  لە کابینەی نوێی حکومەتی هەرێمدا جگە لە پۆستی جێگری سەرۆكی هەرێمی کوردستان هەریەک لە وەزارەتەکانی دارایی، کار و کاروباری کۆمەڵایەتی، بازرگانی، ئاوەدانکردنەوە پشکی ئەو بزوتنەوەیە دەبن.