سەردێڕ:

موسڵ.. لە تونێلێکدا چوار چەکداری داعش کوژران

فۆتۆ: 
2019-06-30

2146 جار خوێندراوەتەوە

لە هێرشێکدا لە پارێزگای نەینەوا، هێزە ئەمنییەکانی عێراق  چوار چەکداری ڕێکخراوی داعشیان لە تونێلێکدا کوشت.

شانەی ڕاگەیاندنی ئەمنیی عێراق لە بەیاننامەیەکدا ئەمڕۆ یەکشەممە (٣٠ی حوزەیرانی ٢٠١٩) بڵاویکردەوە، زانیارییان پێ گەیشتووە لەسەر بوونی چوار چەکداری داعش لە تونێلێکدا لە پارێزگای نەینەوا.

بەگوێرەی بەیاننامەکە، تونێلەکە لە ناوچەی "عەین جەحش"ی پارێزگای نەینەوادا بووە و ئەو چەکدارانە خۆیان تێدا حەشارداوە.

وەک لە بەیاننامەکەدا ئاماژەی پێ کراوە، دوای دیاریکردنی شوێنی ئەو چەکدارانە بە شێوەیەکی ورد، فەرماندەیی ئۆپراسیۆنەکانی نەینەوا هەماهەنگی کردووە لەگەڵ هێزەکانی هاوپەیمانان و لەلایەن فڕۆکە جەنگییەکانی ئەمریکاوە بۆمباران کراوە و، هەر چوار چەکدارەکە کوژراون و تونێلەکەش خاپوربووە.

ئەوەش لەکاتێکدایە، ماوەیەکە لێرە و لەوێ چەکدارانی داعش بە ژمارەی کەم خۆیان دەردەخەن و تا ئێستا لە ناوچە جیاجیاکانی پارێزگای نەینەوا و چەند ناوچەیەکی باشوری کەرکوک و پارێزگای دیالە و سەلاحەدین، هێرش و پێکدادانی چەکداری لە نێوان سوپای عێراق و چەکدارانی داعش ڕوویداوە.

ع.م