سەردێڕ:

ئێن ئاڕ تى وردەکاریی هێرشکردنە سەر پزیشکێک بڵاودەکاتەوە

فۆتۆ: 
2019-06-26

21118 جار خوێندراوەتەوە

شەوی ٢٣ى ئەم مانگە، کوڕێک لەگەڵ دایکیدا چووەتە نەخۆشخانەی فریاکەوتنی چەمچەماڵ تا چارەسەری پێویست بۆ دایکی بکرێت، بەڵام لەکاتى وەرگرتنى چارەسەردا هێرشی کردووەتە سەر پزیشکێکی ئافرەت و بەهۆیەوە چاوێکی زیانی بەرکەوتووە.

فەنەن عەبدولقادر ئەو پزیشکەی هێرشیکراوەتەسەر بە ئێن ئاڕ تیی راگەیاند، نەخۆشێک لەگەڵ کوڕەکەیدا هاتووەتە نەخۆشخانە و کوڕەکەی داوایلێکردووە کە چارەسەری دایکی بکات، کە شتێک لە گوێچکەیدا بووە، ئەویش لەو کاتەدا لەگەڵ پزیشکێکی تایبەت بەو حاڵەتە بە تەلەفۆن قسەی کردووە، بەڵام کوڕەکەی هێرشیکردووەتەسەر و کێشاویەتی بە چاوی چەپیدا.

لە دوای رووداوەکە پۆلیسی چەمچەماڵ کەسێکی دەستگیرکردووە و پەڕاوی لێکۆڵینەوەی بۆ رووداوەکە کردووەتەوە.

رەمەک رەمەزان قایمقامی چەمچەماڵ دەڵێت، وەکو حکومەت سکاڵای یاساییان هەیە و دەستبەجێ فەرمانى دەستگیرکردنى بۆ کەسێک دەرکردووە.

رووداوەکە کاردانەوەى بەدواى خۆیدا هێناوە، ڕێکخراوی خانمە پزیشکەکانی کوردستان و کارمەندانی تەندروستی لە راگەیەندراوێکدا ئاماژەیان بەوە کردووە، ئەو جۆرە ڕەفتارە ناشایستە و ناشرینانە دەبنە هۆکاری ئەوەی گەنجەکان وڵات بەجێبهێڵن.

زیاتر لە ١٠٠٠ پزیشک و یاریدەدەری پزیشک لە دژی هێرشکردنە سەر ئەو پزیشکە واژۆیان کۆکردووەتەوە و داوادەکەن، بە زووترین کات تۆمەتباران و گومانلێکراوان ڕادەستی دادگا بکرێن و بە سزای یاسایی خۆیان بگەیەنن، یاسایەکیش بۆ پاراستنی پزیشک و کارمەند دەربکرێت.

لە ماوەى ئەمساڵدا ئەمە سێیەمجارە هێرشبکرێتە سەر پزیشک و کارمەندانى تەندروستى و بەشێک لە کەیسەکان هێشتا یەکلایی نەکراونەتەوە.

ئ.ر