سەردێڕ:

کەرکوک.. وردەکاریى رفاندنى کچێک لەلایەن ئەفسەرێکى پۆلیسەوە

کەسوکارەکەى سکاڵای یاساییان تۆمارکردووە
فۆتۆ: 
2019-06-15

9366 جار خوێندراوەتەوە

دواى ئەوەى دەزگا ئەمنییەکانى کەرکوک ئەفسەرێکیان بە تۆمەتى دەستدرێژییکردنە سەر کچێک دەستگیرکرد، لە ئێستادا ئەفسەرەکە لە ژێر لێکۆڵێنەوەدایە و سەرۆکى لیژنەى مافى مرۆڤی ئەنجومەنى پارێزگاى کەرکوکیش داوایکرد، هیچ لایەنێک دەست لەم ڕووداوە وەرنەدات.

لەسەر ڕێگای کەرکوک هەولێر لەکاتێکدا ناکۆکی لەنێوانیان کچ و کورێکی دەزگیراندار دروستدەبێت، ئەفسەرێکی پۆلیس بە ئۆتۆمبیلێکی حکومییەوە بەمەبەستی دورخستنەوەی کچ و کورەکە و نەهێشتنی ناکۆکیەکەیان کچەکەی لەگەڵ خۆیدا برد، دواتر دەزگا ئەمنییەكانی كەركوك، دەستگیركردنی ئەفسەرێكیان راگەیاند، كە تۆمەتبارە بە ڕفاندن و دواتر دەستدرێژی کردنە سەر کچێک.

بەپێی ڕاگەیەندراوێکی بەڕێوەبەرایەتی‌ كاروباری‌ ناوخۆیی و ئاسایش لە كەركوك ئەفسەرەکەی پۆلیس کە پلەی ڕائیده، ئۆتۆمبیلێکی جۆری پاترۆڵ نیسانی حکومی بەکارهێناوە بۆ ڕفاندنەکە و پلە و پۆستەکەی بۆ ترساندنی کچەکە بەکارهێناوه، کچەکەش تەمەنی ٢١ ساڵە و فەرمانبەری یەکێک لە نەخۆشخانەکانى کەرکوکە.

جوان حەسەن سەرۆکی لیژنەی مافی مرۆڤ لە ئەنجومەنی پارێزگای کەرکوک دەڵێت، ئەوان هەموو ڕێکارە یاساییەکان دەگرنەبەر و داوادەکەن هیچ لایەنێک دەست لەم ڕووداوە وەرنەدات و مامەڵەی یاسایی لەگەڵ تۆمتبارەکەدا بکرێت.

سەرەتای هەفتەی ڕابردوو، دوای ئاگاداركردنەوەی پۆلیس لە رووداوەكە، بە بڕیاری دادوەر ئەفسەرەکە دەستگیركراوە، لەئێستاشدا لە پزیشکی دادوەری کەرکوک، لێکۆڵینەوە و پشکنینی پزیشکی بۆ کچەکە دەستیپێکردووە.

سرود محەمەد سەرۆکی ڕێکخراوی کۆمەڵەی هیوای عێراق بۆمافی ئافرەتانیش دەڵێت، ئەفسەرەکە پێشێلی یاسا و مافی کچەکەی کردووە، ئەوانیش سکاڵای یاسایی لەسەر ئەفسەرەکە تۆماردەکەن.

ئێن ئارتی هەوڵیدا لێدوانی کەسوکاری کچەکە وەربگرێت، بەڵام ئامادەنەبوون هیچ لێدوانێک بدەن تەنها وتیان سکاڵایان تۆمارکردوە و چاوەڕوانی بڕیاری دادگان.

هەرلەسەر ڕوداوەکە ئێن ئارتی چەندینجار هەوڵیدا لێدوانی پۆلیسی کەرکوک وەربگرێت، بەڵام ئەوانیش ئاماژەیان بەوەکرد، کە ڕاگەیاندراویان لەسەرڕوداوەکە بڵاوکردوەتەوە و هیچ لێدوانێکی دیکەیان نییە.

بەپێی ڕاگەیەندراوەکەی بەڕێوەبەرایەتی‌ كاروباری‌ ناوخۆیی و ئاسایش لە كەركوك ئەفسەرەکە بەپێی‌ مادەی‌ ٣٩٦ لە یاسای‌ سزادانی‌ عیراقی لێکۆڵینەوەی لەگەڵدا دەکرێت، ئەوەش خراوەتەڕوو كە دەستگیراوە بەسەر ئۆتۆمبێلە حكومییەكە و هەموو ئەو كەلوپەلانەی‌ لەکاتی ڕفاندنەکەدا بەکارهاتوون.

ئ.ر