سەردێڕ:

کاوە محەمەد: ئەمڕۆ کۆڵەکەیەکی دیکەی بەبنەماڵەییکردن لە هەرێم داکوتێنرا

فۆتۆ: 
2019-06-11

4675 جار خوێندراوەتەوە

ئەندامێکی فراکسیۆنی گۆڕان لە پەرلەمانی عێراق رایگەیاند، ئەمڕۆ یەکێکە لە رۆژە شومەکانی کوردستان چونکە کۆڵەکەیەکی دیکەی بەبنەماڵەییکردنی سیستمی حوکمڕانیی هەرێم داکوتێنرا و پەرلەمانی کوردستان بێبەهاترکرا.

کاوە محەمەد پەرلەمانتاری فراکسیۆنی گۆڕان لە پەرلەمانی عێراق لە وتارێکدا ئاماژەی بەوە کردووە، لە دەفتەری یاداشتەکاندا ئەمڕۆ دووشەممە (٢٠١٩/٦/١٠) یەکێکە لە رۆژە شومەکانی هەرێمی کوردستان، چونکە "ئەمڕۆ کۆڵەکەیەکی دیکەی بەبنەماڵەکردنی سیستمی حوکمڕانیی هەرێم داکوتێنرا و پەرلەمان و پەرلەمانتارانی کوردستانیش کران بە شاهید بەسەریەوە."

باس لەوەش دەکات، "رێوڕەسمەکەی ئەمڕۆ پێش ئەوەی بۆ سوێندخواردنی سەرۆکی نوێی هەرێم بێت، بۆ چەسپاندنی بەمەرجەعکردنی (مەسعود بارزانی) و رەشکردنەوە و پەراوێزخستنی مێژووی خەباتی سەرکردەکانی دیکە، بەتایبەت (نەوشیروان مستەفا و مام جەلال) بوو".

ئەوەشی خستووەتەڕوو، "ئەمڕۆ هەرچی شکستی حوکمڕانی (٢٨ ساڵ)ی رابردووە و بە پلەی یەکەم (مەسعود بارزانی و نێچیرڤان بارزانی) لێی بەرپرسیارن، کەچی لەرێورەسمە پڕ لەریاکارییەکەی ئەمڕۆدا هەموو ئەو شکست و نەهامەتییانەی ساڵانی رابردوو، بە بۆنەی برایەتی و یەکڕیزی درۆینەوە سپی کرانەوە و بە نرخی (سەرکەوتن و دەستکەوت) فرۆشرانەوە."

ئەو پەرلەمانتارەی دەشڵێت، "رێورەسمەکەی ئەمڕۆ مەسیجی ئەوەی پێگەیاندن کە هاوپەیمانێتیی گەندەڵکارەکانی هەرێم و عیراق، بەهێزە و ئەو دەستەبژێرە شکستخواردووە لەهەر شتێکدا جیاواز و ناکۆک بن، بەڵام هەموویان بەرهەمی یەک کارگەن کە بەردەوام سیاسەت دەهاڕێت و لەئەخلاق دایدەماڵێت."

ئەوەش لەکاتێکدایە، ڕۆژی دووشەممە ١٠ی حوزەیرانی ٢٠١٩ پەرلەمانی کوردستان بۆ سوێندخواردنی سه‌رۆكی هه‌ڵبژێردراوی هه‌رێم لە هۆڵی سەعد عەبدوڵا لە هەولێر کۆبووەوە، دوای ئەوەی رۆژی ٢٨ی ئایار بە دەنگی ٦٨ پەرلەمانتار نێچیرڤان بارزانی وەکو سەرۆکی هەرێم هەڵبژێردرا.

هـ.ع