سەردێڕ:

پارێزگاری ئێستای کەرکوک ناکۆکییەکانی پارتی و یەکێتی قوڵتر کردووەتەوە

فۆتۆ: 
2019-05-22

2929 جار خوێندراوەتەوە

ململانێ و ناکۆکییەکانی پارتی و یەکێتی لەسەر کەرکوک قوڵتربوونەتەوە و هەریەکەیان ئەوی دیکە تۆمەتباردەکات، بە ڕێککەوتن لەگەڵ عەرەبەکان و تورکمانەکان، بۆ یەکلاییکردنەوەی پرسی پارێزگاری کەرکوک.

ئەگەرچی ڕۆژی پێنجی ئەم مانگە، دوای ئەوەی شاندێکی پارتی هاتنە سلێمانی و بە ئامادەبونی کۆسرەت ڕەسوڵ و نێچیرڤان بارزانی، ڕێکەوتنی نێوان پارتی و یەکێتی بۆ پێکهێنانی حکومەت واژۆکرا، بەڵام ناکۆکییەکانی ئەو دوو حزبە لەسەر کەرکوک بەردەوامە.

هەریەکە لە پارتی و یەکێتی یەکتر تۆمەتبار دەکەن، بە ڕێککەوتنی نهێنی لەگەڵ عەرەب و تورکمانەکان، بۆ نمونە میدیاکانی پارتی دەڵێن، یەکێتی لەگەڵ عەرەب و تورکمانەکانی ئەنجومەنی پارێزگای کەرکوک ڕێکەوتووە، بۆ مانەوەی ڕاکان جبوری پارێزگاری بەوەکالەتی کەرکوک لە پۆستەکەی، تا ھەڵبژاردنی داھاتووی ئه‌نجومه‌نی پارێزگاكان، ڕێكکەوتنەکەش بە جۆرێکە، کە پارێزگار سێ جێگری دەبێت و تەنھا یەک جێگریان بۆ کوردە.

بەپێی زانیاری میدیاکانی پارتی بێت، ناوەڕۆکی ئەو ڕێکكەوتنە ئاراستەی بەغدا کراوە، بۆ ئەوەی سه‌رۆك وه‌زیران ڕەزامەندی لەسەر بدات، بەڵام ھێشتا ڕەزامەندی لەسەر نەدراوە.

هەر دوای بڵاوکردنەوەی ئەو هەواڵانە، میدیاکانی یەکێتیش وەک وەڵامێک بۆ پارتی، باسیان لەوەکرد، کە ڕاكان جبوری ماڵی له‌ هه‌ولێره‌ و پەیوەندی ئه‌منیی له‌گه‌ڵ پارتیدا هه‌یه.‌

وەک میدیاکانی یەکێتی بڵاویان کردوەتەوە، ڕاكان جبوری پارێزگاری كه‌ركوك به‌ وه‌كاله‌ت، ماڵێكی له‌ هه‌ولێر به‌ دیاری وه‌رگرتوه‌، ئاماژەیان بەوەشکردووە، دانان و مانه‌وه‌ی ڕاكان جبوری له‌ كه‌ركوك، به‌شێكه‌ له‌ پرۆژه‌یه‌كی گه‌وره‌تر، كه‌ ئێران و توركیا و پارتی و قه‌ته‌ر به‌ چوار قۆڵیی تیایدا به‌شدارن.

یەکێک لە میدیاکانی یەکێتی، لێدوانی ئەحمەد جبوری ناسراو بە ئەبو مازن، سەرکردە لە هاوپەیمانی میحوەری وەتەنی وەرگرتووە و باسی لەوە کردوە، وەک چۆن توانیان بە ڕێککەوتن لەگەڵ پارتی و حەشدی شەعبی و هادی عامری، پارێزگاریی موسڵ دابنێن، بەوشێوەیەش کاردەکەن بۆ کۆنترۆڵکردنی پارێزگاری کەرکوک.

هەر لە میدیاکانی یەکێتییەوە ئاماژە بۆ ئەوەکراوە، کە ئێستا ڕاكان جبوری، له‌سه‌ر هه‌مان ته‌وه‌ری ئه‌بو مازن و بارزانی كار ده‌كات و به‌ پشتیوانیی قه‌ته‌ر و توركیا و ئێران و پارتی، ده‌شیانه‌وێت له‌ هه‌ڵبژاردنی ئه‌نجومه‌نی پارێزگاكاندا، كه‌ بڕیاره‌ كۆتایی ئه‌مساڵ به‌ڕێوه‌بچێت، ده‌ست به‌سه‌ر ئه‌نجومه‌ن و پۆستی پارێزگاری كه‌ركوكدا بگرن و پارێزگاری داهاتووی كه‌ركوك، له‌نێوان عه‌ره‌بی جبور یان توركمانێكدا یه‌كلایی بكرێته‌وه‌ و به‌ هه‌موو شێوه‌یه‌ك كۆتایی به‌ ده‌سه‌ڵاتی كورد بهێنرێت.

ناکۆکییەکانی یەکێتی و پارتی لەسەر کەرکوک و هەوڵی ڕێککەوتنی نهێنی لەگەڵ عەرەب و تورکمانەکان لە دژی یەکتر، ڕەوشی کەرکوکی ئاڵۆزتر کردوە و باجەکەش خەڵکی کەرکوک دەیدەن.

ع.م