سەردێڕ:

هاوپەیمانی ئیسلاح ڕاگەیەندراوێکی لەسەر دۆسیەی دەسگیرکردنی شاسوار عەبدولواحید بڵاوکردەوە

کەیسی دەستگیر کردنی شاسوار عەبدولواحید
فۆتۆ: 
2019-05-20

7226 جار خوێندراوەتەوە

لە بەیاننامەیەکدا هاوپەیمانی ئیسلاح (چاکسازی و بنیاتنان)  لە پەرلەمانی عێراق ڕاگەیەندراوێکی لەسەر دۆسیەی شاسوار عەبدولواحید سەرۆکی جوڵانەوەی نەوەی نوێ بڵاوکردەوە.

لە ڕاگەیەندراویکدا ئەمڕۆ دووشەممە ( ٢٠ی ئایاری ٢٠١٩) هاوپەیمانی ئیسلاح لە پەرلەمانی عێراق سەبارەت بە کەیسی دەستگیرکردنی شاسوار عەبدولواحید، داوایکردووە ڕێزی تەواو بگیرێت لە ڕێوشوێنەکانی دادگەریی و دادپەروەریی و نەزاهەت.

هاوکات هاوپەیمانێتییەکە جەختیکردووەتەوە لە دوورخستنەوەی دۆسیەکە لە هەر دەستوەردانێکی سیاسی بەهۆی هەڵوێستەکانی شاسوار عەبدولواحیدەوە، تایبەت بە هەندێک لە کێشەکانی هەرێمی کوردستان.

هاوپەیمانی ئیسلاح داواشی لە سەرجەم هێزە سیاسییەکانی هەرێمی کوردستان کردووە پارێزگاری بکەن لە دەستکەوتەکانی پرۆسەی دیموکراسی و بنەماکانی ئازادی ڕادەربڕین.

بڕیارە لە دوو ڕۆژی داواهاتوودا دەستەی سیاسی هاوپەیمانی ئیسلاح کۆبوونەوەیەکی تایبەت بە دۆسیەی شاسوار عەبدولواحید ساز بکات.

هاوپەیمانی ئیسلاح لە پەرلەمانی عێراق گەورەترین هاوپەیمانێتی سیاسییە و خاوەنی زیاتر لە ١٨٠ کورسی پەرلەمانی عێراقە.

ئەوە لە کاتێکدایە لە ڕۆژی ١٥ی ئەم مانگەوە شاسوار عەبدولواحید سەرۆکی جوڵانەوەی نەوەی نوێ دوای ئەوەی لە لایەن دادوەری ئاسایشی گشتی سلێمانییەوە فەرمانی دەستگیر کردنی بۆ دەرچوو، چووە بەردەمی دادوەر و لەو ڕۆژەوە دەستگیر کراوە و ڕێگە نادرێت بە کەفالەت ئازاد بکرێت.

ع.م