سەردێڕ:

وردەکاریی گۆڕینی بەشێک لە زەوییە خزمەتگوزارییەکانی هەولێر بۆ بەنزینخانە و غەسلی ئوتۆمبێل

فۆتۆ: 
2019-05-15

2164 جار خوێندراوەتەوە

ماوه‌ی زیاتر له‌ سێ مانگه‌ له‌ سنوری پارێزگای هه‌ولێر، گۆڕینی ڕه‌گه‌زی زه‌وی خزمه‌تگوزاری و سه‌وزایی بۆ پڕۆژه‌ی بازرگانی، ته‌شه‌نه‌ی سه‌ندووه‌.

زه‌وییه‌كان له‌ بنچینه‌دا موڵكی حكومه‌تن و له‌ نه‌خشه‌ی شاره‌وانیشدا بۆ خزمه‌تگوزاری و سه‌وزایی دابینكراون.

له‌ سنوری پارێزگای هه‌ولێریش زۆرترینی ئه‌و زه‌ویانه‌ی كه‌ ڕه‌گه‌زه‌كانیان گۆڕدراوه، كراون به‌ به‌نزینخانه‌ و شوێنی غەسلی ئۆتۆمبێل.

ئه‌ندامێكی ئەنجوومه‌نی پارێزگای هه‌ولێریش، گۆڕینی زه‌وییه‌ خزمه‌تگوزارییه‌كان بۆ درووستكردنی به‌نزینخانه‌، به‌ زیادەڕۆییکردنە سه‌ر موڵكی گشتی دادەنێت.

بەپێى زانیارییەکانى ئێن ئاڕ تی، ئه‌م شوێنه‌ كه‌ ده‌كه‌وێته‌ سه‌ر شه‌قامی ٦٠ مه‌تریی شاری هه‌ولێر و شوێنێكی‌ ستراتیژیی شه‌قامه‌كه‌یه‌، پێشتر‌ هیچ پڕۆژه‌یه‌كی له‌سه‌ر نه‌بووه‌ و له ‌نه‌خشه‌ی شاره‌وانی بۆ سه‌وزایی دابینكراوه‌، له‌ ئێستادا ڕه‌گه‌زی له‌ سه‌وزاییه‌وه‌ گۆڕدراوه‌ بۆ به‌نزینخانه‌ و غەسلی ئۆتۆمبێل.

به‌شێكی زۆری ئه‌و شوێنانه‌شی كه‌ كراون به‌ به‌نزینخانه‌، موڵكی شاره‌وانی بوون‌، به‌ڵام  به ‌شێوه‌یه‌كی موساته‌حه‌ بۆ ماوه‌ی ٢٥ ساڵ، به‌ مه‌به‌ستی وه‌به‌رهێنانێكی دیاریكراو به‌ چه‌ند بازرگانێك دراوه‌.

وه‌زاره‌تی شاره‌وانی و گەشتوگوزاریش ئاگاداری گۆڕینی ڕه‌گه‌زی ئه‌و زه‌ویانه‌یه‌ كه‌ كراون به‌ به‌نزینخانه ‌و ڕێكاری یاساییش به‌رامبه‌ریان گیراوه‌ته‌به‌ر بۆ هه‌ڵگیرانیان.

هه‌رچه‌نده‌ پاراستنی زه‌وییه‌كانی حكومه‌ت به‌ یاسا پارێزراون، به‌ڵام له‌ ئێستادا پێشێلی ئه‌و یاسایه‌ ده‌كرێت و به ‌شێواز و میكانیزمی جۆراوجۆر زه‌وییه‌كان ده‌به‌خشرێن.

گۆڕینى ئەو زەوییانەش لە موڵکى حکومەتەوە و پێدانى بە چەند کەسێک تا پڕۆژەى بازرگانى لەسەر دروستبکەن، هاوکاتە لەگەڵ کۆتاییهاتنى تەمەنى کابینەى هەشتى حکومەت.

ع.م