سەردێڕ:

هەولێر.. بەڕێوەبەرایەتی هاتوچۆ کامێرای چاودێری لە ترافیکەکاندا دادەنێت

فۆتۆ: 
2019-05-13

3278 جار خوێندراوەتەوە

بەڕێوەبەرایەتی هاتوچۆی هەولێر دەستیكردووە بە دانانی كامێرای چاودێری لە ناو ترافیك و چواریانەكاندا و بۆ ماوەی مانگێكیش وەكو تاقیكردنەوەی سەرەتایی كاریان پێدەكرێت،  بۆئەوەی شوفێران لە بوونی سیستەمەکە ئاگاداربن.

نەهرۆ حەسەن، وتەبێژی بەرێوەبەرایەتی هاتوچۆی هەولێر ئاماژەی بەوەکرد، ئەو كامێرا چاودێریانە سەرجەم شێوازەکانی سەرپێچی شوفێران تۆماردەکەن، كە لە نێو چواریانەكاندا دەکرێن و ٢٤ کاتژمێر كاردەكەن و لە ڕێگەی سیستەمێكشەوە راستەوخۆ بە ژووری كۆنترۆڵی كامێرای چاودێری هاتوچۆی هەولێر دەبەسترێتەوە،

ئەوەشی خستەروو،  وەكو تاقیكردنەوەی سەرەتایی لە ئێستادا لە ١٥ ترافیك لە ناوشاری هەولێر كامیراكان بەستراون، بۆیە لەمەودوا شوفێران هیچ دەرفەتێكی سەرپێچیان بۆ ناچێتە سەر بەبێ سزادان.

بەشێک لە شوفێران ئەو هەنگاوە بە گرنگ دەزانن بۆ رێگری كردن لە رووداوەكانی هاتوچۆ، داواشدەكەن ئەو پارەی كە لەرێگەی كامێرای چاودێری كۆدەكرێتە، بۆ چاککردنەوەی شەقامەکان بەکاربهێنرێت.

لە ماوەی رابردوودا چەند رووداوێكی هاتوچۆ لە چواریانەكان روویاندا، كە بەشێكیان رووداوی دڵتەزێن بوون و گیانلەدەستدانی لێكەوتووەتەوە و هەندێک لە رووداوەكانیش لە درەنگانی شەودا بوون.

هـ.ع