سەردێڕ:

ئەو گومانانە چین دەورى ناڕەزاییەکانى ناو نەوەى نوێیان داوە؟

ناڕەزایەتییەکانى ناو جوڵانەوەى نەوەى نوێ
فۆتۆ: 
2019-04-26

5403 جار خوێندراوەتەوە

قسەکانی شادى نەوزاد پەرلەمانتاری نەوەی نوێ لەبارەى هەڕەشەی بڵاوکردنەوەی گرتەی ڤیدیۆیی نەشیاو و هەڕەشەکردن لە پەرلەمانتارانى فراکسیۆنەکە، چەندین گومانی دروستکردووە، بەتایبەت لەکاتێکدا کە دۆسیەکە پەیوەستە بە یاسای خراپ بەکارهێنانى مۆبایل، کە دەبوو بەو یاسایە مامەڵەی لەگەڵدا بکرایە نەک مادەى تر.

بەم پێیەش لێکۆڵینەوە و بەدواداچوونى پرۆسەکە لە چوارچێوەى کار و پسپۆڕیى پۆلیسدایە، بەڵام ئەوەی دەگوزەرێت، ئاسایش لێکۆڵینەوەى دۆسیەکەى لەئەستۆ گرتووە و ئەوان لێکۆڵینەوە لە بابەتەکە دەکەن.

ئەوەی ڕوویدا، لە ١٢ى شەودا هێزێکى ئاسایشى سەربە یەکێتى لە سلێمانی بە تەنیا لەسەر قسەی کەسێک، چەند خۆبەخشێکى نەوەی نوێ دەستگیردەکەن و تا ئێستاش ئازادنەکراون، لێرەشدا ئەو پرسیارە زەق دەبێتەوە بۆچی ئاسایش ئەم کارە دەگرێتە ئەستۆ و لای دادوەری ئاسایشە؟ لەکاتێکدا ئەمە ئەرکی پۆلیسە، بۆچی و چۆنیش ئەو پەرلەمانتارانە چوونەتە لای ئاسایش و ئاسایش خەڵک دەستگیردەکات؟

جگە لەمانەش سەرجەم میدیاکانى سەربە پارتى و یەکێتى و پەیج و ئەکاونتەکانى نزیک لەو دوو حزبە، لە یەکەم ساتى پرۆسەکەدا بە شێوەیەکى چروپڕ ڕووماڵى کۆنفڕانسە ڕۆژنامەوانییەکەیان کرد و چەندین هەواڵ و بابەتیان لەسەر بڵاوکردەوە و، گرنگییەکى تەواویان بە پرسەکە دا، لەکاتێکدا پێشتر هیچ گرنگییەکیان بە کار و چالاکییەکانى نەوەى نوێ نەدەدا و هەواڵیان لەسەر نەدەکرد.

لە لایەکی ترەوە و لە دواى ئەوەى شاسوار عەبدولواحیدى سەرۆکى جوڵانەوەى نەوەى نوێ سەرجەم ئەو قسە و باسانەى ڕەتکردەوە و دڵنیایی دایە پەرلەمانتارانى حزبەکەى و خەڵکى کوردستان ئەو ئەو بابەتانە هیچ بنەمایەکى ڕاستییان نیە و وەک خۆی دەڵێت، لە داهاتوودا ڕاستییەکان بۆ گشت لایەک ئاشکرا دەبێت، بەڵام ئەو میدیایانەی هەموو ڕاگەیەندراو و لێدوانەکانی دژبە سەرۆکی جوڵانەوەکەیان بڵاودەکردەوە، هیچ ڕوونکردنەوەیەکی ناوبراویان نەکرد بە هەواڵ، و هیچ گرنگییەکى میدیاییان بە وەڵامەکانى نەدا. بەشێکی شیکردنەوەکان ئەمە وا لێکدەدەنەوە کە پارتى و یەکێتى هەوڵەکانى خۆیان چڕتر کردووەتەوە و هاوتەریب بە یەک ئاراستە کاردەکەن لەپێناو دروستکردنى گومان و لێدان لە پرۆژەى سیاسى ئۆپۆزسیۆن، چونکە لە بەرامبەردا نەوەی نوێ وەک خۆیان دەڵێن، دەیانەوێت ڕووبەڕووى هەموو کەمتەرخەمی و گەندەڵییەکانی دەسەڵات ببنەوە.

 ئ.ر