سەردێڕ:

هەڤاڵ ئەبوبەکر: یەكێتی و پارتی پشتگیریم دەكەن بۆ مانەوەم لە پۆستی پارێزگاری سلێمانی

فۆتۆ: 
2019-04-18

8293 جار خوێندراوەتەوە

پارێزگاری سلێمانی ڕایگەیاند، یەکێتی و پارتی پشتگیریی دەکەن تا وەک پارێزگاری سلێمانی بمێنێتەوە و بەردەوامبێت.

هەڤاڵ ئەبوبەکر لەمیانی بەشداریکردنی لە بەرنامەی تاوتوێی ئێن ئاڕ تیدا ئاماژەی بەوەش کرد، "یەكێتی لافیتەی هەڵدەواسی كە من نەبمە پارێزگار، بەڵام ئێستا خۆیان حەزدەكەن بمێنمەوە."

وتیشی، دەبێت لە دەرەوەی یەكێتی و پارتی لە پەرلەمان ئۆپۆزسیۆنێكی بەهێز هەبێت.

دەربارەی ناکۆکیی نێوان لایەنەکانیش جەختیکردەوە، ئەگەر ناكۆكییەكانی لایەنەكان زیاتر ببێت، لایەنێكی دیکە دەبێتە خاوەنی سلێمانی.

لەسەر ماوەی پارێزگاریی خۆی ئەوەی ئاشکراکرد، "لەو كاتەوە بوومەتە پارێزگاری سلێمانی ١٨ هەزار مامەڵەی خەڵكم بۆ هاتووە و، كارمان لەسەر ١٣ هەزاری كردووە."

هەڤاڵ ئەبوبەکر قسەی لەسەر ڕووداوەکانی سلێمانی کرد و ئەوەی خستەڕوو، ئەو ڕووداوانەی ڕوودەدەن لە شاری سلێمانی، هیچیان بە ڕێكخراوی نەكراون و هیچ حزبێكیشیان لەپشتەوە نییە.

پارێزگاری سلێمانی پشتگیریی لە بڕیارەکەی پەرلەمانی عێراق کرد لەسەر یاریی پەبجی و وتی، "لەگەڵ قەدەغەكردنی یاریی پەبجیدام لە هەرێمی كوردستان."

ع.ا