سەردێڕ:

عادل عەبدولمەهدی: داوامان لە ئەمریکا کردووە بڕیارەکەی دژی سوپای پاسداران رابگرێت

ناساندنی سوپای پاسداران وەک رێکخراوێکی تیرۆرستی
عادل عەبدولمەهدی، سەرۆک وەزیرانی عێراق
فۆتۆ: 
2019-04-10

5623 جار خوێندراوەتەوە

سەرۆک وەزیرانی عێراق ئاشکرای کرد، بۆ راگرتنی بڕیاری ناساندنی سوپای پاسداران وەکو رێکخراوێکی تیرۆرستی قسەیان لەگەڵ ئیدارەی ئەمریکا کردووە و ئەو بریارەشی بە خراپ وەسف کرد.

رۆژی سێشەممە (٩ی نیسانی ٢٠١٩)، عادل عەبدولمەھدی سەرۆک وەزیرانی عێراق لە کۆنفرانسێکی رۆژنامەوانیدا ئاشکرایکرد، ھەوڵدەدەن پەیوەندییەکانیان بەکاربھێنن بۆئەوەی ململانێی ئێران و ئەمریکا نەگاتە ئاستێکی لەوە خراپتر، بۆئەو مەبەستەش عێراق پەیوەندییەکانی لەگەڵ ھەردوولا بەکاردەھێنێت بۆ راگرتنی ململانێکان.

 سەرۆک وەزیرانی عێراق وتیشی، عێراق پابەندە بە پاراستنی ئەمن و ئاسایشی خۆی و دراوسێکانی و ناوچەکەش، نایانەوێت هیچ ململانێیەک لەسەر خاکی عێراقدا رووبدات، چونکە لە ماوەی دوو دەیەی رابردوو هیچ وڵاتێک بەڕادەی عێراق رووبەرووی شەڕ و ململانێ نەبووەتەوە.

راشیگەیاند، بەزاندنی سنورەکانی یەکتر بە زیان بۆ هەموو ولایەک دەشکێتەوە بەتایبەت بۆ ئەمریکا، هەر یەک لە ئێران و ئەمریکا  پلانی یەکتر باش دەزانن، عێراقیش لەسەر شێوازی خۆی بەردەوام دەبێت و هێڵی سوری ئەوانی دیکە نابەزێنێت وناچێتە ناو ئەو ململانێیەوە.

ئەوەشی خستەروو، بەرنامەی عێراقی ئەوەیە خۆی لە هەر ململانێ و پێکدادانێک بەدووربگرێت، چونکە ئەگەر بچێتە ناو ئەو گێژاوە، ئەو کاتە هەموو لایەک زیان دەکات.

رۆژی ٨ی نیسانی ٢٠١٩، دۆناڵد ترەمپ سەرۆکی ویلایەتە یەکگرتوەکانی ئەمریکا ڕایگەیاند، بەتۆمەتی بەشداریکردن لە چالاکیی "تیرۆرستی" و پشتیوانیکردن و درێژکردنەوەی ئەرکی وەکو بەشێک لە سیاسەتی دەسەڵاتدارانی ئێران سوپای پاسدارانی ئێران خستە لیستی تیرۆری وڵاتەکەیەوە.

هەمان رۆژ و لە وەڵامى بڕیارەکەى ئەمریکا، ئەنجومەنى باڵاى ئاسایشى نیشتمانى ئێران لە بەیاننامەیەکدا فەرماندەى ناوەندى هێزەکانى ئەمریکا لە ڕۆژئاواى ئاسیا و ئەو هێزانەى پشتیوانییان دەکات خستە لیستى تیرۆرى وڵاتەکەی.

هاوکات حکومەتی ئێران بڕیارەکەى ئەمریکاى بە بریارێکى نایاسایی و مەترسی بۆ سەر ئاسایشى ناوچەکە و جیهان ناوبرد.

سوپای پاسدارانی ئێران لە دوای بەرپابوونی شۆڕشی ئیسلامی ئێران لە ساڵی ١٩٧٩ بە فەرمانی ئایەتوڵا خومەینی ڕابەری پێشووی ئێران دامەزراوە، ئەرکی ئەو هێزە پاراستنی سیستمی کۆماری ئیسلامی ئێرانە لە ناوەوە و دەرەوە، لە کاتێکدا سوپای ئێران ئەرکی پاراستنی سنورەکانی ئەو وڵاتەی لە ئەستۆدایە.

هـ.ع