سەردێڕ:

ڕێگاى دووسایدی‌ سه‌یدسادق ـ عه‌ربه‌ت تا ئێستا تەواو نەکراوە

فۆتۆ: 
2019-04-07

1711 جار خوێندراوەتەوە

مانگی شەشی ساڵی ڕابردوو بەڕێوەبەرایەتیی ڕێگاوبانی سلێمانی دەستیکرد بە نۆژەنکردنەوەی لاینێکی ڕێگای دووسایدی سەیدسادق ـ عەربەت، بەڵام دوای تێپەڕبوونی نزیکەی ھەشت مانگ ھێشتا بەشێکی پرۆژەکە تەواونەبووە، کە نزیکەی ٢٠٠ مەترە و کەوتووەتە ‌نزیک دەروازەی سەیدسادق.

ئەو شۆفێرانەی کە ڕۆژانە ھاتوچۆ بەو ڕێگایەدا دەکەن دەڵێن، حکومەت دەیان ملیۆن دیناری داھاتی مەرزی باشماخ و شۆشمێی دەستدەکەوێت، کە لەسەر ئەم ڕێگایەیە، بەڵام نەیتوانیوە گرفتەکانی چارەسەربکات.

درێژیی ڕێگای نێوان سەیدسادق ـ عەربەت ٢٣ کیلۆمەترە و ڕۆژانە سەدان ئۆتۆمبێلی جۆراوجۆر ھاتوچۆی لێوە دەکەن و نزیکەی حەوت ساڵە کراوە بە دووساید، بەڵام ساڵانە چەند بەشێکی ڕێگاکە نۆژەندەکرێتەوە.

ئیبراھیم عەزیز بەڕێوەبەرایەتی رێگاوبانی سلێمانی کە ‌سەرپەرشتیی نۆژەنکردنەوەی ڕێگاکە دەکات، کەشوھەوا و زۆریی ڕێژەی باران و تەواونەبوونی دیزاینی پرۆژەکە،‌ بە ‌ھۆکاری تەواونەبوونی ڕێگاکە دادەنێن.

جگە لەم ڕێگایە، پرۆژەی ڕێگای دووسایدی نێوان سەیدسادق ـ ھەڵەبجە دوای چوار ساڵ کارکردن تێیدا ھێشتا تەواونەکراوە، ھاوکات ڕێگای پێنجوێن ـ سەیدسادق، کە ڕێگای سەرەکیی مەرزی نێودەوڵەتیی باشماخ و سلێمانیشە، تەنھا ٢٠ کیلۆمەتری تەواوکراوە و نیوەی پرۆژەکەش تەواونەکراوە.‌

د.ن