سەردێڕ:

ئۆپراسیۆنە هاوبەشەکانی عێراق: هیچ ڕێککەوتنێک نەکراوە سەبارەت بە گەڕانەوەی پێشمەرگە بۆ کەرکوک

یەکێک لە گۆڕەپانەکانی شاری کەرکوک
فۆتۆ: ئەرشیڤ
2019-02-06

2615 جار خوێندراوەتەوە

ئۆپراسیۆنە هاوبەشەکانی عێراق ئەو هەواڵانەی ڕەتکردەوە کە دەزگاکانی ڕاگەیاندن بڵاویانکردووەتەوە سەبارەت بە بڵاوکردنەوەی هێزەکانی پێشمەرگە لە پارێزگای کەرکوک. ئاماژەی بەوەش کردووە، چەکدارانی داعش دەستیانکردووە بە سوودوەرگرتن لە هەندێک لە سەنگەرەکانی نێوان هێزە ئەمنییەکان و پێشمەرگە.

یەحیا ڕەسوڵ وتەبێژی فەرمیی ئۆپراسیۆنە هاوبەشەکانی سوپای عێراق لە بەیاننامەیەکدا ئەمڕۆ چوارشەممە (٦ی شوباتی ٢٠١٩) ڕایگەیاند، "هیچ ڕێککەوتنێک نییە کە ئاماژە بکات بە گەڕانەوەی هێزەکانی پێشمەرگە بۆ کەرکوک و هیچ ناوچەیەکی دیکە."

ئاماژەی بەوەش کرد، وێنەی ڕاستەقینەی ڕووداوەکان بەو شێوەیە، چەکدارانی داعش دەستیانکردووە بە سوودوەرگرتن و گەڕانەوە بۆ ئەو ناوچانەی دەکەونە نێوان هێزەکانی پێشمەرگە و سوپای عێراق، بۆیە دۆخەکە پێویستی بە هەماهەنگی هاوبەش هەیە بۆ لەناوبردنی "تیرۆریستان" لەو ناوچانەی کە جێگەی بایەخی هەردوولایە و، دەبێت هەماهەنگی هەبێت لەگەڵ هێزەکانی پێشمەرگە.

دوێنێ شاندێکی وەزارەتی پێشمەرگە بە سەرۆکایەتی کەریم سنجاری لەگەڵ شاندێکی وەزارەتی بەرگریی عێراق لە بەغدا کۆبوونەوەتەوە و سەرچاوەیەکى ئاگاداریش لە کۆبوونەوەکە بە دیجیتاڵ میدیاى ئێن ئاڕ تى ڕاگەیاند، بەپێی ڕێککەوتنەکەى وەزارەتی پێشمەرگە و شاندی وەزارەتی بەرگریی عێراق، پێشمەرگە و لیوای ٦١ی سەربە ئەنجومەنی وەزیرانی عێراق، سنوری بازگەکانی چواردەوری شارى کەرکوک دەگرنەدەست.

ئەوەش لەکاتێکدایە، ڕۆژى چوارى ئەم مانگە كۆبوونه‌وه‌یەکی هاوبەش لە نێوان لیژنه‌یەک لە وه‌زاره‌تی پێشمه‌رگه‌ و وه‌زاره‌تی به‌رگریی عێراق به‌ڕێوه‌چوو، لەبارەى کۆبوونەوەکەشەوە جەبار یاوەر ئەمیندارى گشتیی وەزارەتى پێشمەرگە ڕایگەیاند، لە کۆبوونەوەکەدا گفتوگۆ لەبارەى دۆخی ناوچه‌ كوردستانییه‌كانی ده‌ره‌وه‌ی ئیداره‌ی هه‌رێمەوە کراوە.

ع.م