سەردێڕ:

ژیان كچە ونبووەكەی هەڵەبجە بوو بە خاوەنی ناسنامەی عێراقی

ژیان هەڵەبجەیی
فۆتۆ: ئێن ئاڕ تی
2019-01-20

5805 جار خوێندراوەتەوە

دوای سێ ساڵ لە چاوەڕوانی و هاتوچۆكردنی دادگاكان دواجار مەریەم باروچیانی كچە ونبووەكەی هەڵەبجە لە دادگای باری کەسێتی هەولێر ناسنامەی عێراقی بەناوی ژیان هەڵەبجەیی وەرگرت.

ژیان، یەكەمجارە لە دەرگای دادگاوە بە دڵخۆشی دێتە دەرەوە و دەڵێت "ئەگەر ئێن ئاڕ تی بەڵگەی ئەوەی نەخستایەتە ڕوو كە من هاوناز نیم نەمدەتوانی ئەمرۆ ببمە خاوەنی ناو و ناسنامەی خۆم".

مانای ناوە نوێیەکەی مەریەم بەم شێوەیە، ژیانێكی تازە دەستپێبكەیت و كامەران بژیت، لهۆنیش ناوی یەكێكە لە عەشیرەتە كۆنەكانی هەڵەبجە، ناوی دایكیشی بە كوردستان دارا پێشڕەو دانراوە بەو مانایەی كوردستان دایكی هەموانە.

ئەیاد كاكەیی پارێزەرە خۆبەخشەکەی دۆسیەكەی ژیان دەڵێت، بڕیارەكەی دادگا تەمیز ناكرێتەوە چونكە بەڕێوەبەرایەتی شارستانی تەنازولی كردووە لە دۆسیەكەدا بۆیە لە ماوەی كەمتر لە مانگێكدا كارەكانی دەرهێنانی ناسنامە و كاروبارەكانی بۆ تەواو دەكرێت و دەنێردرێتە بەغدا.

لوقمان هەورامی سەرۆكی كۆمەڵەی قوربانیانی كیمیابارانی هەڵەبجە،  باس لەوە دەكات منداڵانی ونبونی هەڵەبجە زۆرن و تائێستا نەتوانراوە بگەڕێنرێنەوە بۆ كوردستان، بۆیە پێویستە لە ئاستێكی باڵادا بۆردێك دروستبكرێت بۆ ئەوەی بە وردی هەماهەنگی لەگەڵ حكومەتی عێراق و ئێراندا بكرێت، تا سەرجەم ونبووان بگەڕێنرێنەوە بۆ هەرێم.

ساڵی ٢٠١٥ ژیان هەڵەبجەیی وەک منداڵێکى ونبووى كیمیابارانەكەی هەڵەبجە گەڕایەوە پارێزگاکە، پاش سێ مانگ کرا بە کچى خێزانێك و ناوی هاونازی پێدرا، لە مانگی تەمموزى ٢٠١٦دا ئێن ئاڕ تی بەڵگەی خستە ڕوو  كە مریەم هاوناز نییە، دواتر و پاش چەند دانیشتنێكی دادگا مانگی نیسانی ساڵی رابردوو ناوی هاونازی لێوەرگیراییەوە و بێ ناسنامە مایەوە.

بەپێی ئەو ئامارەی لە بەردەستی كۆمەڵەی قوربانیانی كیمیابارانی هەڵەبجەدایە تا ئێستا  ١٧٩ منداڵ  لەلایەن ٧٤ خێزانەوە داوا كراون كە منداڵیان لە كیمیابارانی هەڵەبجەدا ونبووە.

د.ن