سەردێڕ:

هاوپەیمانی نێودەوڵەتی دژ بە داعش هەواڵێکی حەشدی شەعبی ڕەتدەکاتەوە

هاوپەیمانی نێودەوڵەتی دژ بە داعش هەواڵێکی حەشدی شەعبی ڕەتدەکاتەوە
فۆتۆ: ئەرشیڤ
2019-01-19

3517 جار خوێندراوەتەوە

هاوپەیمانی نێودەوڵەتی دژ بە داعش هەواڵێکی حەشدی شەعبی ڕەتدەکاتەوە، کە ڕایانگەیاندبوو ڕێگرییان لە هێزەکانی ئەمریکا کردبوو لە سەر سنوری سوریا پشکنین بکەن.

هاوپەیمانان بە ماڵپەڕی دەنگی ئەمریکایان ڕاگەیاندووە، لە چەند رۆژی ڕابردوودا بە هەماهەنگی لەگەڵ هێزەکانی ئاسایشی عێراق رووپێوییەکیان لە رۆژئاوای پارێزگای ئەنبار ئەنجامداوە، ئەوەش لە چوارچێوەی هەوڵە بەردەوامەکانیانبووە بۆ تێکشکاندنی تەواوەتی داعش.

هاوپەیمانان دەڵێن، "کاری رووپێویەکە پلانی بۆ دانراوە و کراوە بە بێ ئەوەی هیچ ڕووداوێکیان توشببێت".

ئاماژەیان بەوەشکردووە "هێزەکانی هاوپەیمانان لەگەڵ هێزەکانی ئاسایشی عێراقدا پێکەوە کاردەکەن بۆ پاراستنی ئاسایشی سنورەکان و جەخت دەکەنەوە لەوەی ڕێکخراوی داعش سەرهەڵنەداتەوە".

ئەمەش دوای ئەوەدێت، رۆژی سێ شەممەی ڕابردوو حەشدی شەعبی لە ڕاگەیەندراوێکدا بڵاویکردەوە، ڕێگرییان لە هێزەکانی ئەمریکا  کردووە ئۆپراسیۆنێکی "پشکنینی گوماناوی" لە سەر سنوری نێوان عێراق و سوریا ئەنجام بدەن.

قاسم موسلیح فەرماندەی هێزەکانی حەشدی شەعبی لە ئەنبار، ئەوەشی ڕاگەیاندبوو، "فەرماندەیی ئەنباری حەشدی شەعبی ڕێگرییان لە هێزەکانی ئەمریکا کردووە پشکنینەکە ئەنجام بدەن و ناچاریان کردوون بگەڕێنەوە بنکە سەربازییەکەی خۆیان و ڕوبەڕوی حەشدی شەعبی نەبنەوە".

ش.ق