سەردێڕ:

​قائیمقامییەتى سلێمانى: سەرقاڵى پاککردنەوەى ڕێگاکانین

چیاى ئەزمەڕ
فۆتۆ: قائیمقامییەتى سلێمانى
2019-01-18

2379 جار خوێندراوەتەوە

قائیمقامییەتى سلێمانى ڕایگەیاندووە، به‌مه‌به‌ستی پاككردنه‌وه‌ی رێگاوبان و ڕاماڵێنی به‌فر و لابردنی ئاسته‌نگه‌كانی  هاتوچۆكردن، تیمه‌كانی لیژنه‌ی فریاگوزاری خێرای قائیمقامییه‌ت تا ئێستا سه‌رقاڵی پاككردنه‌وه‌ی سه‌رجه‌م رێگاكانی‌ ناوشارو ده‌ره‌وه‌ی شاره‌كانن.

قائیمقامییەتى سلێمانى ئاماژەى بەوەشکردووە، تائێستا هیچ گرفتێک دروست نه‌بووه‌ و پاککردنەوەی شەقامەکان بە ئاسایی بەڕێوەدەچێت.

هاوکات ئاوات محەمەد قائیمقامی سلێمانی ڕوونیکردنەوە، به‌ تیمێكی زۆر و ماندبونێكی زیاتر كار بۆ ڕزگاركردنی ئەو کەسانە دەکرێت کە بۆ بەسەربردنى کاتێکى خۆش ڕوو لە ناوچە شاخاوی و گەشتیارییەکان دەکەن و ڕووبەڕووى گرفت دەبنەوە.

قائیمقامی سلێمانى داواشی لە هاوڵاتییان کردووە، خۆیان له‌ناوچه‌ مه‌ترسیداره‌كان بپارێزن تا ئه‌و كاته‌ی كه‌شوهه‌وا له‌ بار ده‌بێت.

لە دوێنێوە شەپۆلێکى بەفر و باران ناوچەکانى هەرێمى کوردستانى گرتەوە و بەو هۆیەشەوە ئاستەنگى هاتوچۆ لە زۆربەى ڕێگاکانى هەرێم دروستبوو.

لە سنورى پێنجوێن کە ساڵانە بەفرێکى زۆرى تیادا دەبارێت ئاستەنگى هاتوچۆ دروستدەبێت، بەڵام زانا عەبدولڕەحمان قائیمقامی پێنجوێن بۆ دیجیتاڵ میدیاى ئێن ئاڕ تى ڕایگەیاند، لە ئێستادا هیچ ئاستەنگیەکى هاتوچۆ لەو سنورە دروست نەبووە.

ئ.ر