سەردێڕ:

​لیژنەیەکى پەڕلەمانى عێراق لێپێچینەوە لە کۆمپانیاى سۆمۆ دەکات

فۆتۆ: 
2019-01-16

805 جار خوێندراوەتەوە

لیژنەى نەوت و گازى پەڕلەمانى عێراقى داواکارییەکى ئاڕاستەى وەزیرى نەوت کردووە بۆ ئامادەکردنى بەرێوەبەرى گشتیى کۆمپانیاى "سۆمۆ" بەمەبەستى لێپێچینەوە لەبارەى نەوتى فرۆشراوى عێراق و پشک و موڵکەکانى ئەم کۆمپانیایە لەناوەوەو دەرەوەى وڵات.

بەپێى نوسراوێکى فەرمى لیژنەى نەوت و گازى ئەنجومەنى نوێنەران کە واژۆى "کەریم عەفتان" سەرۆکى ئێستاى لیژنەکەی لەسەرەو رۆژى چوارشەممە ١٦ کانونى دووەم ٢٠١٩ ئاڕاستەى وەزارەتى نەوت کراوە، لیژنەکە داواى ئامادەبوونى "عەلا خزر کازم" ى بەرێوەبەرى گشتى کۆمپانیاى سۆمۆ دەکات لەگەڵ بەرێوەبەرى گشتى بەبازاڕکردنى نەوت و بەرێوەبەرى شەحن و بەتاڵکردنەوەى نەوت لەرۆژى سێ شەممەى داهاتوو ٢٢ کانونى دووەمى ٢٠١٩.

لەداواکارییەکەدا کە وێنەیەکی دەست ئێن ئاڕ تی کەوتووە لیژنەکە داوا دەکات بەرێوەبەرەکان سەرجەم بەراییەکان و کۆپى رێککەوتننامەکانى فرۆشتنى نەوتى خاوو هاوبەشى و ئسوڵەکانى کۆمپانیاکە و پشکەکانى لەناوەوەو دەرەوەى عێراق لەگەڵ خۆیاندا بهێنن بۆ پەڕلەمان.

جێگەى ئاماژەیە پێشتر پەرلەمانتارى لیستى سادیقونى عەسایب ئەندازیار عودەى عەواد کۆمپانیاى نەوتى عێراق و کۆمپانیاى نەوتى سۆمۆى نیشتمانى تۆمەتبارکرد بە گەندەڵى و بەهەدەردانى پارە لەگرێبەستەکانیدا.

کۆمپانیاى سۆمۆ لقێکى وەزارەتى نەوتى فیدراڵییە و بەرپرسە لەهەناردەکردن و بەبازاڕکردنى نەوتى عێراق و سەر بەکەرتى گشتییەو تاکە لایەنى فەرمى رێگەپێدراویشە بۆ ئەم کارە بەپێى یاسا بەرکارەکانى عێراق.

هـ،ڕ