سەردێڕ:

خانەقین.. داعش فێرگەیەکی مەشقی بۆ ڕاهێنانی خەڵکی سنورەکە کردووەتەوە

داعش فێرگەیەکی مەشقی بۆ ڕاهێنانی خەڵکی سنورى خانەقین کردووەتەوە
فۆتۆ: 
2019-01-14

20284 جار خوێندراوەتەوە

وێنەیەک کە تیایدا دەردەکەوێت چیرۆكی شه‌وانی گوندنشینانی ڕۆژئاوای خانه‌قین ده‌گێڕێته‌وه‌، كه‌ به‌ چه‌كی خۆیان پارێزگاری له‌ خۆیان ده‌كه‌ن، ئەوەش بارودۆخی زۆربه‌ی گونده‌كانی سنووری قه‌زای خانه‌قینه‌ به‌هۆی زۆربوونی جموجۆڵی گروپه‌ چه‌كداره‌كان و زیادبوونی توندوتیژییه‌كانه‌وه‌.

به‌پێی زانیارییه‌كانی ئێن ئاڕ تی، پاشماوه‌كانی داعش له‌سه‌ر به‌نداوی حه‌مرین فێرگه‌یه‌كی مه‌شق و ڕاهێنانیان كردووه‌ته‌وه‌، فه‌رمانده‌یه‌كی پێشمه‌رگه‌ش دەڵێت ژماره‌یه‌ك بیانییش له‌و فێرگه‌یه‌ وه‌ك ڕاهێنه‌ر كارده‌كه‌ن.

عوسمان حەسەن فەرماندەى لیواى ١٣٦ى پێشمەرگەش ‌دەڵێت، جموجوڵەکانى داعش زیاتر بە شەوە و لەو فێرگەیە مەشقی سەربازییان پێ دەکەن بە شێوەى مەفرەزە دەیانبەنە ناوچەکان.

به ‌وته‌ی به‌رپرسانی ئه‌منی ناوچه‌كه‌، ئەو كارانه‌ی پاشماوه‌كانی داعش له‌ چوارچێوه‌ی خۆ ڕێكخستنه‌وه‌دایە، به‌شێكیشیان له‌ ناوچه‌كانی دوور له‌ ده‌سه‌ڵاتی داعش خۆیان حه‌شارده‌ده‌ن.

زمناكۆ عومه‌ر وته‌بێژی ئاسایشی ڕۆژئاوای سلێمانی به‌ ئێن ئاڕ تی ڕاگه‌یاند، چه‌كدارێكی پێشووی داعشیان له‌ گوندێكی چه‌مچه‌ماڵ ده‌ستگیركردووه‌ كه‌ به‌شداریی شه‌ڕه‌كانی حه‌ویجه‌ی دژبه‌ پێشمه‌رگەی‌ كردووه‌، دواتر بۆ خۆحه‌شاردان ڕووی له‌و سنوورە كردووه‌.

عوسمان حەسەن فەرماندەى لیواى ١٣٦ى پێشمەرگە ئاماژەى بەوەش کرد، وه‌زاره‌تی به‌رگریی عێراق داوای له‌ وه‌زاره‌تی پێشمه‌رگه‌ كردووه‌ ئۆپه‌راسیۆنی هاوبه‌شیان هه‌بێت له‌ خانه‌قینه‌وه‌ تا شنگال، به‌ڵام پێشمه‌رگه‌ به‌وه‌ ڕازی نین و ده‌یانه‌وێت به‌ فه‌رمی بگه‌ڕێنه‌وه‌ بۆ ئه‌و ناوچانه‌، بەڵکو داواى ئەوە دەکەن پێشمەرگە بە گشتى بگەڕێتەوە ناوچە دابڕاوەکان.

لە ئێستادا چه‌كدارانی داعش له‌ ڕۆژئاوای خانه‌قینه‌وه‌ تا ڕۆژهه‌ڵاتی كه‌ركوك جموجوڵیان هەیە و شه‌وانه‌ هێرش ده‌كه‌نه‌ سه‌ر گونده‌كان، تا ئێستاش پێشمەرگە و سوپاى عێراق ڕێکنەکەوتوون لەسەر ئەوەى بە ئۆپەراسیۆنى هاوبەش کۆتایی بە پاشماوەکانى داعش بهێنن.

ڕۆژى یەکشەممە جەبار یاوەر ئه‌مینداری گشتیی وه‌زاره‌تی پێشمه‌رگه‌ له‌ ڕاگه‌یه‌ندراوێكدا ڕایگەیاندبوو، تا ئێستا هیچ کۆبوونەوەیەکى فەرمى نەبووە لە نێوان ئەوان و وەزارەتى بەرگرى لەبارەى گەڕانەوەى پێشمەرگە بۆ ئەو ناوچانە، بەڵام گەیشتوونەتە ئەو بڕوایەى باشترین ڕێگا بۆ لەناوبردنى داعش ئۆپراسیۆنى هاوبەشه.

ئ.ر