سەردێڕ:

​کامەران مەنتک: یەکێتی و پارتی هێزی مردوون و دەبێت گۆڕەپانی سیاسیی بەجێبهێڵن

کامەران مەنتک توێژەر و مامۆستای زانکۆ
فۆتۆ: ئێن ئاڕ تی
2019-01-13

3199 جار خوێندراوەتەوە

کامەران مەنتک توێژەر و مامۆستای زانکۆ رایگەیاند، یەکێتی و پارتی هێزی مردوون، هەر دەبێت گۆڕەپانی سیاسی بەجێبهێڵن.

لە میانی بەشداریکردنی لە بەرنامەی تاوتوێ ئێن ئاڕ تیدا وتیشی "ئەم حزبانەی دەسەڵات تەنانەت شایەنی ئەوە نین رەخنەشیان لێبگیرێت چونکە هیچ شتێکی نوێیان پێ نییە بۆیە حکومڕانی بەجێدەهێڵن."

راشیگەیاند، هیچ ئەگەرێکی باشبوون لەم حزبانەی دەسەڵاتدا نەماوە و مانەوەشیان پەیوەندی بە هۆکارە هەرێمییەکانەوە هەیە و داردەستی هێزە گەورەکانی دونیان.

دەربارەی گرنگی ئۆپۆزسیۆنی راستەقینە رایگەیاند، ئەگەر هێزەکان ئۆپۆزسیۆنی راستەقینە بن و بتوانن شەقام بجوڵێنن نەک ئۆپۆزسیۆنی میدیاکان، دەتوانن گۆڕانکاریی دروستبکەن، بەڵام ئەو هێزانەی پێشتر ئۆپۆزسیۆن بوون زیاتر ئۆپۆزسیۆنی میدیایی بوون و کە چوونە ناو حکومەتەوە نەیانتوانی دروشمەکانیان جێبەجێبکەن بۆیە شکستیان هێنا.

وتیشی، "ئەگەر هێزێکی ئۆپۆزسیۆن ئامانجی گەورەی هەبێت دەتوانێت گۆڕانی گەورە دروستبکات و شەقام بجوڵێنێت چونکە کوردستان لە دۆخێکدایە دەتوانرێت بە ئاسانی شەقام بجوڵێنرێت و بخرێتە ناو بازنەی بڕیاردانی ئەم وڵاتەوە."

کامەران مەنتک رەخنەی لە حزبە ئۆپۆزسیۆنەکان و بەشدار لە دەسەڵات گرت و رایگەیاند، ئەو هێزانەش تەنها رەخنە دەگرن و هیچ بەدیلێکیان پێ نییە تەنها دەیانەوێت بەم جۆرە درێژە بە مانەوەی خۆیان بدەن و ئەم دوو حزبەیان کردووە بە بیانوو بۆ بەردەوام بوونی خۆیان.

راشیگەیاند، کارکردنی ناتەندروستی حزبەکانی تر یەکێتی و پارتیان بەهێزکردووە ئەگینا خەڵک پشتی تێکردوون و لە رووی سیاسیی، ئابوری و سەربازییەوە شکستیان هێناوە.

دەربارەی ئەزموونی بزوتنەوەی گۆڕان لە حکومەتدا رایگەیاند، گۆڕان ئەزمونێکی شکستخواردوویان هەیە لە ناو حکومەتدا و بچنە حکومەتی نوێوە بچوکتر دەبنەوە.

وتیشی، "هەرحزبێک بچێتە ناو ئەم حکومەتەوە تەنها پاشکۆ دەبێت و ناتوانێت هیچ شتێک بگۆڕێت."

ع.ا