سەردێڕ:

سۆران حسێن: تا ئێستا فەرهاد محەمەدی تەمەن سێ ساڵ ئازاد نەکراوە

فەرهاد محەمەد
فۆتۆ: ئێن ئاڕ تی
2019-01-12

30699 جار خوێندراوەتەوە

سۆران حسێن برای تارا حسێن وتەبێژی تەڤگەری ئازادی رایگەیاند، تا ئێستا فەرهاد محەمەدی تەمەن سێ ساڵ بەم وەرزی سەرمایە لە زینداندایە وئازاد نەکراوە.

سۆران حسێن برای تارا حسێن وتەبێژی تەڤگەری ئازادی بە دیجیتاڵ میدیای ئێن ئاڕ تی رایگەیاند، لە ناو دەستگیرکراوەکانی ئاسایشی سلێمانیدا فەرهاد محەمەدی تەمەن سێ ساڵ و کەلسوم حسێنی دایکی تێدایە و هەتا ئێستا ئازاد نەکراون.

ڕاشیگەیاند، بەپێی زانیارییەکان ئەو پیاوانەی دوێنێ لە سەکۆی ئازادی دەستگیرکراون لە زندانی کانی گۆمەن بەڵام هەتا ئێستا چارەنوسی نزیکەی ٢٠ ژنی دەستگیرکراو روون نیە و ئاسایشی یەکێتی بێسەروشوێنی کردوون.

بەپێی زانیاری میدیاکانی نزیک لە تەڤگەری ئازادی، وەک نیشاندانی ناڕەزایی لە بەرامبەر دەستگیرکردنیان بەبێ هیچ بەهانەیەکی یاسایی و بەرتەسککردنەوەی ئازادیی ڕادەربڕین و چالاکییە مەدەنیی و سیاسییەکان، ئەوانەی دوێنێ دەستگیرکراون لە زیندانی کانی گۆمە مانیان لە خواردن گرتووە.

دوای ئەوەی ئەندامانی تەڤگەری ئازادی ویستیان لە سەکۆی ئازادی ناو پارکی ئازادی فیلمێکی تایبەت بە ژیان و خەباتی ساکینە جانسز نمایش بکەن، هێزەکەی ئاسایش ڕێگریانکرد و  ٥٢ کەسی لێ دەستگیرکردن کە لە نێویاندا تارا حسێنی وتەبێژی تەڤگەری ئازادی و هاوسەرۆکانی تەڤگەری تێدایە.

ئـ. فـ