سەردێڕ:

یەکێتى ئاڵای کوردستانی لەسەر زۆربەی بارەگاکانی داگرت

لە دوای کۆبوونەوە لەگەڵ بەرپرسانى  عێراق
فۆتۆ: 
2019-01-11

22771 جار خوێندراوەتەوە

دیجیتاڵ میدیای ئێن ئاڕ تی، ئاسۆ ئەحمەد، کەرکوک

یەکێتى ئاڵای کوردستانی لەسەر زۆربەی بارەگاکانی لابرد و تەنها لەسەر بارەگای مەڵبەند و مەکتەبی سیاسی یەکێتی لە کەرکووک ماوەتەوە.

عەلی قەڵایی بەرپرسی کۆمیتەی ئیمام قاسم یەکێتی لە کەرکوک بە دیجیتاڵ میدیای ئێن ئاڕ تی ڕاگەیاند، لە کۆبوونەوەکانی دوێنێیان لەگەڵ عادل عەبدولمەهدی سەرۆک وەزیرانی عێراق وعه‌بدولوه‌هاب ساعدی فه‌رمانده‌ی هێزه‌كانی دژه‌ تیرۆری عێراق بە یەکێتی وتراوە هەتا یەکلایکردنەوەی پرسی ئاڵاکە لە دادگای فیدڕاڵی عێراق، دەبێت ئاڵای کوردستان تەنها لە دوو شوێن هەڵبکرێت.

ئەوەشی ڕاگەیاند، ئاڵای کوردستان تەنها لە هەردوو بارەگای مەڵبەند و مەکتەبی سیاسی یەکێتی هەڵدەکرێت و لەسەر سەرجەم بارەگاکانیان لە شار و کۆمیتە و ڕێکخراوەکان، دادەگیرێت.

هاوکات بەختیار شاوەیس پەرلەمانتاری یەکێتى لە پەرلەمانى عێراق بە ئێن ئاڕ تی ڕاگەیاند، "تەنها لە کۆمیتەکان ئاڵای کوردستانمان داگرتووە، چونکە لەسەر هەندێک کۆمیتە ئاڵاکە هەڵکرابوو، هەندێکی تر لە کۆمیتەکان ئاڵایان هەڵنەکردبوو".

دوێنێش ڕێبوار تەها بە دیجیتاڵ میدیای ئێن ئاڕ تی ڕاگەیاند، لەسەر هەڵکردنی ئاڵای کوردستان، حکومەتی عێراق سکاڵای لەسەر یەکێتی لە دادگای فیدراڵی تۆمارکردووە ئەوانیش بەهەمان شێوە سکاڵایان تۆمارکردووە لە ئێستادا لە چاوەڕوانی بڕیاری دادگادان هەتا پرسەکە یەکلایبکاتەوە.

شەوى سێشەممە لەسەر چوارشەممە( ٨ی کانوونی دووەمی ٢٠١٩)مەڵبەندى یەکێتیی نیشتمانیی لە کەرکوک ئاڵاى کوردستانى لەسەر بارەگاکەى خۆى لەو شارە هەڵکرد، ئەمەش کاردانەوەی پێکهاتەکانی تری کەرکوکی لێکەوتەوە ئەم هەنگاوەیان بە هەوڵى سەپاندنى ئەمرى واقیع و نایاسایی دایە قەڵەم.

هــ.حــ