سەردێڕ:

عادل عەبدولمەهدی نامەیەکی ئاراستەی سەرۆکی سوریا کردووە

فلح فەیاز نامەکەی عادل عەبدولمەهدی گەیاندووەتە بەشار ئەسەد
فۆتۆ: سانا
2018-12-29

3763 جار خوێندراوەتەوە

عادل عەبدولمەهدی سەرۆک وەزیرانی عێراق نامەیەکی ئاراستەی بەشار ئەسەدی سەرۆکی سوریا کرد، تەوەرەی سەرەکیی نامەکە تایبەتبووە بە بایەخی هەماهەنگیی نێوان هەردوو وڵات و، گەشەپێدانی پەیوەندییەکانی نێوان هەردوولا.

ئاژانسی هەواڵی سانای سوریا ئەمڕۆ شەممە (٢٩ی کانوونی یەکەمی ٢٠١٨) بڵاویکردەوە، بەیانیی ئەمڕۆ بەشار ئەسەد سەرۆکی سوریا نامەیەکی لە عادل عەبدولمەهدی سەرۆک وەزیرانی عێراقەوە پێگەیشتووە و نامەکەش لەلایەن فالح فەیاز ڕاوێژکاری ئاسایشی نیشتیمانی عێراقەوە گەیەنراوەتە ئەسەد.

ئاژانسەکە ڕوونیکردووەتەوە، نامەکە تایبەتبووە بە گەشەپێدانی پەیوەندییەکانی نێوان هەردوو وڵات و بایەخی هەماهەنگی نێوانیان لە بوارەکانی تایبەت بە دژایەتیکردنی تیرۆر و هاریکاریی هەرێمایەتی، بەتایبەت لە سنوری هاوبەشی نێوان هەردوو وڵات.

بەگوێرەی ئاژانسی سانا بەشار ئەسەد بە فەیازی ڕاگەیاندووە، ڕووداوە پۆزەتیڤەکانی ناوچەکە، بەتایبەت سەبارەت بە گێڕانەوەی ئاسایش و ئارامی لە زۆربەی ناوچەکانی سوریا و عێراق، جەختکردنەوەیە لەوەی گەلانی ناوچەکە ئیرادەی ئەوەیان هەیە پارێزگاری بکەن لە سەروەری وڵاتەکانیان و ئەو ئیرادەیەش بەهێزترە لە پیلانە دەرەکییەکان.

لە بەرامبەریشدا فالح فەیاز ڕاوێژکاری ئاسایشی نیشتمانی عێراق ئاماژەی بەوە کردووە، سەرکەوتنی گەلی عێراق بەسەر تیرۆردا و، ئەو سەرکەوتنانەش کە سوریا تۆماریکردووە، سەرجەمیان ئاماژەی خێرن بۆ تەواوی ناوچەکە.

سەردانەکەی ئەمڕۆی فالح فەیاز بۆ سوریا لەکاتێکدایە، لە ماوەی ئەم مانگەدا زنجیرەیەک سەردانی شاندی باڵای دیپلۆماتی بۆ سوریا و کۆبوونەوە لەگەڵ بەشار ئەسەد، ئاماژەن بۆ دووبارە بەهێزبوونەوەی حکومەتی سوریا، بەتایبەت دوای ئەوەی هەفتەی ڕابردوو، عومەر حەسەن بەشیر سەردانی سوریای کرد، دوێنێش ئیماراتی عەرەبی یەکگرتوو ڕایگەیاند، باڵیۆزخانەی وڵاتەکەی دووبارە دەکاتەوە و سعودیەش ئامادەیی خۆی دەربڕیوە بۆ بەشداریکردن لە ئاوەدانکردنەوەی سوریا.

ع.م