سەردێڕ:

بەشێک لە خاوەن کێڵگە پەلەوەرییەکان: لە ساڵی ٢٠١٨دا زیاتر لە ١٠٠ ملیار دینار زەرەرمانکردووە

بەشێک لە خاوەن کێڵگە پەلەوەرییەکان: لە ساڵی ٢٠١٨دا زیاتر لە ١٠٠ ملیار دینار زەرەرمانکردووە
فۆتۆ: ئێن ئاڕ تی
2018-12-29

1493 جار خوێندراوەتەوە

بەشێک لە خاوەن کێڵگە پەلەوەرییەکانی هەرێمی کوردستان رایانگەیاند، لە ساڵی ٢٠١٨دا زیاتر لە ١٠٠ ملیار دینار زەرەریانکردووە و خاوەن کێڵگە پەلەوەرییەکانی پارێزگای سلێمانیش پشکی شێریان بەرکەوتووە.

لە کۆنفرانسێکی رۆژنامەوانیدا بەشێک لە خاوەن کێڵگە پەلەوەرییەکان رایانگەیاند، داهاتی کێڵگە پەلەوەرییەکانی هەڵەبجە و گەرمیان و سلێمانی لە ساڵی ٢٠١٨دا نزیکەی ١١٠ ملیۆن تەن مریشک بووە. ئاماژەیان بەوەشکرد، لەماوەی ئەمساڵدا ٨٠٠ پڕۆژەیان لەبوارەکەی خۆیاندا جێبەجێکردووە.

ئەوەشیان خستەڕوو، لەمساڵدا خاوەن کێڵگە پەلەوەرییەکانی هەرێمی کوردستان زیاتر لە ١٠٠ ملیار دینار زەرەر و زیانیان بەرکەوتووە و زۆرترین زیانیش بەر خاوەن کێڵگە پەلەوەرییەکانی پارێزگای سلێمانی کەوتووە چونکە ئەو پارێزگایە زۆرترین کێڵگەی پەلەوەریی تێدایە.

بەشێک لە خاوەن کێڵگە پەلەوەرییەکانی هەرێمی کوردستان راشیانگەیاند، ئەگەرچی زیاتر لە ٦٠ ملیار دیناریان لە پڕۆژەکانیاندا خەرجکردووە، بەڵام کێشەی دابینکردنی غاز و کارەبا و دانەوێڵەیان هەیە و بۆ چارەسەرکردنی کێشەکانیشیان حکومەتی هەرێمی کوردستان هیچ هاوکارییەکی نەکردوون.

ئاماژەیان بەوەشکرد، دەنگۆی بڵاوبوونەوەی نەخۆشی ئەنفلۆنزای باڵندە لە هەرێمی کوردستان دوورە لە راستییەوە و ئەو جۆرە نەخۆشییە نە ئەمساڵ و نە دوو ساڵی رابردووش لە هەرێم بوونی نەبووە.

ش.ق