سەردێڕ:

لە ساڵی ٢٠١٨دا ٦٩ کۆچبەری نایاسایی عێراقی گیانیان لەدەستداوە

لە ساڵی ٢٠١٨دا ٦٩ کۆچبەری نایاسایی عێراقی گیانیان لەدەستداوە
فۆتۆ: ئەرشیڤ
2018-12-27

549 جار خوێندراوەتەوە

دیجیتاڵ میدیای ئێن ئاڕ تی، هەولێر، رێناس عەلی

لەمساڵدا ٦٩ هاوڵاتی عێراقی لە رێگای کۆچی نایاسایی گیانیان لەدەستداوە کە لەو ژمارەیە تەرمی  ١٧کەسیان تا ئیستا نەدۆزراوەتەوە.

فەهیم فەرهەنگ ئەندامی فیدراسیۆنی کۆچبەرانی عێراق بە دیجیتاڵ میدیای ئین ئاڕ تی راگەیاند، لەماوەی چوار ساڵی رابردوودا زیاتر لە ٢٧٤ هاوڵاتیی عێراقی لە رێگای ئەوروپادا گیانیان لەدەستداوە و بێسەروشوێن بوون کە زیاتر لە ٧٠%یان هاوڵاتی هەرێمی کوردستان بوون.

ئاماژەی بەوەشکرد، تەنها لە ساڵی ٢٠١٨دا، ٦٩ هاوڵاتی عێراق لە رێگای چوون بۆ ئەوروپا گیانیان لەدەستداوە و لەو ژمارەیەش، ١٧یان تا ئێستاش بێسەروشوێنن. و تەرمەکانیان نەدۆزراونەتەوە.

ئەوەشی خستەڕوو، هەر لەماوەی ئەمساڵدا زیاتر لە ٤٧ هەزار کەس لە عێراقەوە کۆچیان کردووە بۆ ئەوروپا و وڵاتانی رۆژئاوا کە زۆربەیان خەڵکی هەرێمی کوردستان بوون.

فەهیم فەرهەنگ راشیگەیاند، بەراورد بە ساڵانی رابردوو، لەمساڵدا ئاماری کۆچی نایاسایی هاوڵاتیانی عێراق بە هەرێمی کوردستانیشەوە کەمبووەتەوە.

دووپاتیشیکردەوە، ئەو ئامارە و زانیاریانەی کە لە تۆڕە کۆمەڵایەتییەکاندا بڵاودەبێتەوە سەبارەت بە کۆچ و گیانلەدەستدانی هاوڵاتییان لەو رێگایەدا، هەڵەن و دوورن لە راستییەوە.

ش.ق