سەردێڕ:

خەزعەلی بۆ ترەمپ: ئەگەر لە عێراق دەرنەچن وەک ٢٠١١ دەرتاندەپەڕێنین

کاردانەوەکان بۆ سەردانەکەی ترەمپ بۆ عێراق
خەزعەلی هەڕەشەی کردنەدەرەوەی هێزەکانی ئەمریکا دەکات
فۆتۆ: ئەرشیڤ
2018-12-27

13884 جار خوێندراوەتەوە

قەیس خەزعەلی ئەمینداری گشتی عەسائیبی ئەهلی حەق لەسەر سەردانە کتوپڕەکەی ترەمپ بۆ عێراق وتی، " ئەگەر هێزەکانت لە عێراق نەچنە دەرەوە، ئەوا ئەزموون و توانای کردنەدەرەوەتانمان هەیە بە ڕێگای تر کە سوپاکەت دەیزانن وەک چۆن لە ٢٠١١ بە زەلیلی دەرپەڕێنران."

خەزعەلی لە تویتێکدا لە تۆڕی کۆمەڵایەتی تویتەر دەربارەی هەڵوێستی عێراقییەکان رایگەیاند، وەڵامی عێراقییەکان لە رێگای پەرلەمانەوە دەبێت و ئەگەر هێزەکانی ئەمریکا لە عێراق نەکشێنەوە توانا و ئەزموونی دەرکردنی ئەم هێزانەیان هەیە.

راشیگەیاند، ئەم سەردانەی ترەمپ بۆ بنکەیەکی سەربازی لە عێراق بەبێ رەچاوکردنی رێوشوێنە دیپلۆماسییەکان راستیی پڕۆژەی ئەمریکی لە عێراقدا دەرخست.

هاوپەیمانی بیناش کە لە هاوپەیمانی فەتحی هادی عامری و دەوڵەتی یاسای نوری مالکی و چەند لیستێکی تر پێکدێت، سەردانەکەی ترەمپی رەتکردەوە و رایگەیاند، دەبێت باڵیۆزی ئەمریکا بانگهێشت بکرێت.

راشیگەیاند، سەردانەکەی ترەمپ پێشێلکردنێکی ئاشکرای رێوشوێنە دیپلۆماسییەکانە و ئەمەش بە تەواوی رەتدەکرێتەوە. ئەم سەردانە  نیشانەی پرسیاری زۆر دەخاتە سەر سروشتی ئامادەیی هێزەکانی ئەمریکا لە عێراق و ئامانجە راستەقینەکانی و مەترسی دروستکردن بۆ ئاسایشی عێراق کە بەدەستی هێزەکانی حەشدی |شەعبی و هێزە عێێراقییەکان بەدەستهاتووە.

شەوی رابردوو (٢٦ی کانونی یەکەمی ٢٠١٨) دۆناڵد ترەمپ سەرۆکی ئەمریکا بە سەردانێکی کتوپڕ گەیشتە عێراق و لە بنکەی (عەین ئەلئەسد)ی  سەربازی سەر بە پارێزگای ئەنبار لەگەڵ هێزەکانی ئەمریکادا کۆبوەوە و چاوی بە هیچ بەرپرسێکی عێراقی نەکەوت، راشیگەیاند هێزەکانی لە عێراق ناکشێنەوە، ئەمەش کاردانەوەی کەسایەتیی و لایەنە سیاسیەکانی عێراقی لێکەوتەوە.

ع.ا