ئارى هەرسین: کاک نەوشیروان مونافیسێکى بەهێزى ئێمە بوو

ئارى هەرسین: کاک نەوشیروان مونافیسێکى بەهێزى ئێمە بوو
19/05/2017

90748 جار خوێندراوەتەوە

+ -

پەرلەمانتارێکى پارتى وێڕاى پرسە و سەرەخۆشى خۆى بەبۆنەى کۆچى دوایی نەوشیروان مستەفاوە، دەڵێت "کاک نەوشیروان مونافیسێکى بەهێزى ئێمە بوو".

ئەمڕۆ هەینى ئارى هەرسین پەرلەمانتارى پارتى ڕایگەیاند، به‌ داخێكی زۆره‌وه‌ ئه‌م به‌یانیه‌ كاك نه‌وشیروان مسته‌فا كۆچی دوایی كرد.

هەروەها دەڵێت "كاك نه‌وشیروان زیاد له‌ نیو سه‌ده‌ كه‌سایه‌تیه‌كی دیاری مه‌یدانی سیاسی خه‌باتی ڕزگاریخوازی كورد بووه‌، و هه‌ر له‌ هه‌ڕه‌تی لاوێتیه‌وه‌ به‌ گیانی له‌خۆبورده‌یی و ته‌وازوع داكۆكیكارێكی سه‌رسه‌ختی مافه‌ ڕه‌واكانی نه‌ته‌وه‌كه‌مان بووه‌".

هەروەها دەشڵێت، ''له‌م ڕێچكه‌ دوورو درێژه‌ی ژیانی كوردایه‌تیدا به‌ڕێزیان ڕیزێك به‌رهه‌می گرنگیان بۆ كتێبخانه‌ی كوردی به‌جێهێشتوه‌، له‌وانه‌یه‌ هه‌ندێكمان مولاحه‌زه‌مان له‌سه‌رهه‌ندێك بۆچوون و وێستگه‌ی مێژوویی كاك نه‌وشیروان هه‌بێت، به‌ڵام ئه‌وه‌ شتێكی ئاساییه‌، چونكه‌ ناكرێت هه‌مومان نوسخه‌ی یه‌كتر بین.''

ناوبراو ئەوەشى وت، ڕه‌نگه‌ جیاوازه‌كانی فكر به‌ ته‌نیا نوێنه‌رایه‌تی یه‌ك ڕه‌هه‌ند له‌ كۆمه‌ڵگه‌دا ده‌كه‌ن، به‌ڵام كه‌ بوون به‌ چه‌پكه‌ ڕه‌نگ، تابلۆیه‌ك ده‌نه‌خشێنن كه‌ نوێنه‌رایه‌تی هیچ ڕه‌نگێكیان ناكات و، له‌ هه‌مان كاتدا پارێزگاری له‌ ڕۆڵی تاك به‌ تاكی ڕه‌نگه‌كانیش ده‌كات.

ئارى هەرسین ئاماژەى بۆ ئەوەش کرد، كه‌سانی به‌ ویژدان و ئازا و خاوه‌ن مه‌بده‌ئی سیاسی هه‌میشه‌ خوازیارن كه‌ مونافیسه‌كانیان خه‌ڵكی به‌هێز بن بۆئه‌وه‌ی موماره‌سه‌ی ته‌حه‌دا گه‌وره‌كان بكه‌ن "كاك نه‌وشیروان ئه‌و مونافیسه‌ به‌هێزه‌ی به‌رامبه‌ر ئێمه ‌بووە و خۆشبه‌ختانه‌ ئێمه‌ بیره‌وه‌ریه‌كی مته‌وازعمان له‌گه‌ڵ ئه‌م براده‌ره‌ی خۆمان پێ بڕاوه‌".

ئەو پەرلەمانتارەى پارتى ئەوەشى وتووە، هه‌ر وه‌ك براده‌رێك پرسه ‌و سه‌ره‌خۆشی خۆمان ئاڕاسته‌ی چیا، نما و چرا و كه‌س و كاری كاك نه‌وشیروان و سه‌رجه‌م ئه‌ندام و لایه‌نگره‌كانی بزوتنه‌وه‌ی گۆڕان ده‌كه‌ین و "دڵنیایان ده‌كه‌ینه‌وه‌ كه‌ له‌م خه‌مه‌ گه‌وره‌یه‌دا به ‌ته‌نیا نین و ئه‌م پرسه‌یه‌ پرسه‌ی هه‌موومانه"‌.

ئەمڕۆ هەینى بزووتنەوەی گۆڕان ڕایگەیاند، نەوشیروان مستەفا ڕێکخەری گشتی بزووتنەوەی گۆڕان لە سلێمانی بەهۆی نەخۆشییەوە کۆچی دوایی کرد، بڕیاریشە سبەینێ لە کاتژمێر ١٠ ی بەیانی تەرمەکەی لە گردی زەرگەتە بەخاک بسپێردرێت.

نەوشیروان مستەفا کێیە؟

نەوشیروان مستەفا لە ساڵی ١٩٤٤ لە گەڕەکی سەرشەقامی شاری سلێمانی لەدایکبووە و لە ساڵی ١٩٦٧ کۆلێژی زانستە سیاسییەکانی زانکۆی بەغدای تەواو کردووە.

لە ساڵی ١٩٦٧ دا نەوشیروان مستەفا بووە بە ئەندامی لقی سلێمانی پارتی دیموکراتی کوردستان و یەکێکە لە دامەزرێنەرانی یەکێتی نیشتیمانی کوردستان لە ساڵی ١٩٧٥ دا و تا ساڵی ٢٠٠٦ لە ناو یەکێتیدا کاری کردووە و جێگری سکرتێری گشتی یەکێتی بووە.

لە ٢٥ تەمووزی ٢٠٠٩ دا بزووتنەوەی گۆڕانی دامەزراند و لیستەکەی ٢٥ کورسی خولی سێیەمی پەرلەمانی بەدەستهێنا و لە خولی چوارەمیشدا گۆڕان ٢٤ کورسی پەرلەمانی بەدەستهێنا.

نەوشیروان مستەفا لە ساڵی ١٩٨١ هاوسەرگیری کردووە و دوو کوڕ و کچێکی هەیە بە ناوەکانی نما و چیا و چرا و چەندین کتێبی لە بواری مێژوویی و ڕۆژنامەگەریدا نوسیوە و زنجیرە کتێبێکیشی هەیە کە تایبەتە بە ژیانی سیاسی خۆی و ئەو ڕووداوانەی لە کاتی ئەنجامدانی کاری سیاسیدا ڕوویانداوە.

ش.ع