یونامی: نەوشیروان موستەفا هەمیشە وەک سەرکردەیەکی گرنگی چاکسازی و دیموکراسی ناسراوە

یونامی: نەوشیروان موستەفا هەمیشە وەک سەرکردەیەکی گرنگی چاکسازی و دیموکراسی ناسراوە
19/05/2017

8359 جار خوێندراوەتەوە

+ -

یان کوبیش نوێنەرى تایبەتى سکرتێرى گشتیى نەتەوە یەکگرتووەکان بۆ عێراق (یونامی) بەبۆنەى کۆچى دوایى نەوشیروان مستەفا ڕیکخەرى گشتیى بزووتنەوەى گۆڕانەوە ڕایگەیاند، نەوشیروان موستەفا کەسایەتییەکی مێژوویی هەرێمی کوردستانی عیراق بوو و ڕێبازەکەی بەردەوام دەبێت و هەمیشە وەک سەرکردەیەکى گرنگى چاکسازى و دیموکراسى ناسراوە.

یان کوبیش نوێنەری تایبەتی سکرتێری گشتی نەتەوە یەکگرتووەکان بۆ عیراق لە شارى بەغدا پرسەنامەیەکى بەبۆنەى کۆچى دوایى نەوشیروان مستەفا ڕێکخەرى گشتیى بزووتنەوەى گۆڕان بڵاوکردەوە و تیایدا هاتووە "یان کوبیش هاوخەمی خۆی دەردەبڕێت سەبارەت بە کۆچی دوایی ڕێکخەری گشتی بزووتنەوەی گۆڕان، بەڕێز نەوشیروان موستەفا، کە کەسایەتییەکی مێژوویی هەرێمی کوردستانی عیراق بوو".

یان کوبیش ڕاشیگەیاندووە "نەوشیروان موستەفا هەمیشە وەک سەرکردەیەکی گرنگی چاکسازی و دیموکراسی ناسراوە کە جۆش و خرۆشی خستبووە نێو پرۆسەی سیاسی هەرێمی کوردستانی عیراق و خەڵکی سەرسام کردبوو بە تێڕوانینە سیاسییەکەی."

لە بەشێکى ترى ڕاگەیاندراوەکەى یان کوبیشدا باسى ئەوەش کراوە کە "نەتەوە یەکگرتووەکان لە عیراق زۆر خەمبارە بە بیستنی هەواڵی کۆچی دوایی ئەو کەسایەتییە مێژووییە، بەتایبەتی لەم ئان و ساتەی ژیانی سیاسی عیراق و هەرێمی کوردستانی عیراق".

لە کۆتایى ڕاگەیاندراوەکەى یونامیدا ئەوەش هاتووە "لەدەستدانی ئەو زاتە خەسارەتێکی گەورەیە، بەڵام ڕێبازەکەی هەر بەردەوام دەبێت. پرسە و سەرەخۆشی خۆمان ئاڕاستەی خانەوادەی بەرێز نەوشیروان موستەفا و بزووتنەوەی گۆڕان و هاووڵاتییانی هەرێمی کوردستانی عیراق و گەلی عیراق دەکەین."

ئەوەش لە کاتێکدایە سەرلەبەیانیى ئەمڕۆ شۆڕش حاجى وتەبێژى بزووتنەوەى گۆڕان ڕایگەیاند، نەوشیروان مستەفا ڕیکخەرى گشتیى بزووتنەوەى گۆڕان لە کاتژمێر ٨ى ئەم بەیانییەدا لەدواى ململانێیەکى سەخت لەگەڵ نەخۆشیدا، کۆچى دوایى کرد.

نەوشیروان مستەفا ڕێکخەرى گشتیى بزووتنەوەى گۆڕان لە تەمەنى ٧٣ ساڵیدا کۆچى دوایى کرد و بڕیارە سبەى کاتژمێر ١٠ى سەرلەبەیانى لە گردى زەرگەتەى شارى سلێمانى بە خاک بسپێردرێت.

تاوەکو ئێستا بەبۆنەى کۆچى دوایى نەوشیروان مستەفاوە چەندین پەیامى سەرەخۆشى ئاڕاستەى بنەماڵە و کەسوکار و لایەنگران و ئەندامانى بزووتنەوەى گۆڕان کراون.

ر.م