فەرماندەیەکی پێشمەرگە: فڕۆکەکانی هاوپەیمانان زیاتر بە دەوروبەری کەرکوکەوە سەرقاڵن

فەرماندەیەکی پێشمەرگە: فڕۆکەکانی هاوپەیمانان زیاتر بە دەوروبەری کەرکوکەوە سەرقاڵن
فڕۆکەیەکی جەنگی هاوپەیمانان
6 رۆژ پێش ئێستا

14050 جار خوێندراوەتەوە

+ -

فەرماندەیەکی هێزەکانی پێشمەرگە ڕایگەیاند، فڕۆکەکانی هاوپەیمانان لە ئێستادا زیاتر بە دەوروبەری کەرکوکەوە سەرقاڵن.

شوان حەمەغەریب فەرماندەى لیواى پێشمەرگە لە ڕۆژئاواى کەرکوک، دوێنێ ١١ی کانونی دووەمی ٢٠١٧ بە دەنگى ئەمەریکاى وت "لەوەتەى ئەرکى هێزەکانى هاوپەیمانان لە شنگال و مەخمور کەمتر بووەتەوە، فڕۆکەکانیان زیاتر سەرقاڵن بە دەوروبەرى کەرکوکەوە و لە حاڵەتى ڕووداوى نەخوازراودا داعش بۆردومان دەکەن".

وتیشی "لە شنگالەوە تا مەخمور سوپاى عێراق کەوتوونەتە نێوان سەنگەرەکانى پێشمەرگە و داعشەوە، بۆیە هاوپەیمانان لەو ناوچانە کەمتر داعش بۆردومان دەکەن".

لەلایەکی ترەوە عەقید باپیر محەمەد فەرماندەى پێشمەرگە لە ڕۆژئاواى کەرکوک بە دەنگى ئەمەریکاى ڕاگەیاند "هەرکات داعش چەکدار کۆبکاتەوە فڕۆکەکانى هاوپەیمانان لێـیان دەدەن".

بەرەبەیانی دوێنێ فڕۆکەکانی ھاوپەیمانان بە چڕی بۆردمانی ناوچەکانی زنجیرە چیای بانێویان کرد لە رۆژئاوای کەرکوک کە لەژێر کۆنترۆڵی داعشدان.

بەپێى وتەى بەرپرسانى پـێشمەرگە، بەهۆى بۆردومانى فڕۆکەکانى هاوپەیمانانەوە پێنج پێگەی داعش لە خۆرئاواى کەرکوک وێرانکراون، بۆردومانەکانیش لەو کاتەدا بووە کە داعش هێزى چەکدار و ئۆتۆمبێلى بۆمبڕێژکراوى ئامادەکردووە و گومانى ئەوەکراوە کە ویستبێتیان هێرش بکەنە سەر پێشمەرگە.

ک.ئ