وەزارەتی گواستنەوە: ئینتەرنێتی بێ بەرامبەر بۆ دامودەزگا میریەكانی هەڵەبجە دابینکراوە

وەزارەتی گواستنەوە: ئینتەرنێتی بێ بەرامبەر  بۆ دامودەزگا میریەكانی هەڵەبجە دابینکراوە
1 هەفتە پێش ئێستا

13897 جار خوێندراوەتەوە

+ -

وەزارەتی گواستنەوە و گەیاندنی حکومەتی هەرێم رایگەیاند، وەزارەتەکەیان ئینتەرنێتی بێ بەرامبەری بۆ دام و دەزگا میرییەکانی پارێزگای هەڵەبجە بەبێ بەرامبەر دابینکردووە.

وەزارەتی گواستنەوە و گەیاندن لە ڕاگەیەندراوێکدا کە وێنەیەکەی بۆ دیجیتاڵ میدیای ئێن ئاڕ تی ناردووە تێیدا هاتووە "ئینتەرنێتی بێبەرامبەر بۆ زیاتر لە ٥٠ دام و دەزگای حكومی لە پارێزگای هەڵەبجە دابینکراوە و لەماوەیەكی نزیكدا ئینتەرنێتێكی نوێ بەناوی فایبەر ئۆپتیك (FTTH) كە ئینتەرنێتی بێسنورەو هەرسێ (تەلەفزیۆن و ئینتەرنێت و تەلەفۆن)دەگرێتەوە لە پارێزگاكانی سلێمانی و هەڵەبجەو ئیدارەی ڕاپەڕین و گەرمیان بەكاردەخرێن".

مەولود باوە موراد، وەزیری گواستنەوە و گەیاندنی هەرێم لە لێدوانێکی ڕۆژنامەوانیدا ڕایگەیاندووە "لەئێستادا ئینتەرنێتی فایبەر ئۆپتیك (FTTH) كە ئینتەرنێتی بێسنورە و چاودێری دەكرێت لەپارێزگاكانی هەولێر و دهۆك بەركارە و لەوڕێیەوە باشترین خزمەتی هاوڵاتیان دەكەین لەو خزمەتگوزاریە تا زۆرترین سوودی لێ ببینن بەنرخێكی گونجاو لە ئاست نرخە نێودەوڵەتیەكان".

وەزیری گواستنەوەو گەیاندن ئاشكراشی كرد "لەسەرەتای بەپارێزگابوونی شاری هەڵەبجەوە بڕیاماندا بەوەی جگە لە بڕیاری كردنەوەی بەڕێوبەرایەتیە گشتیەكانی وەك (بەڕێوبەرایەتی گواستنەوەو پۆستەو گەیاندن و كەشناسی) ئەوپەڕی تواناو خزمەتەكانمان بخەینەگەڕ تا لەڕێگای وەزارەتەكەمانەوە باشترین و زۆرترین خزمەتگوزاری بەو شارە بكەین و بۆ ئەم مەبەستەش بۆ زیاتر لە ٥٠ فەرمانگەو دام و دەزگای حكومی ئینتەرنێتی بێبەرامبەرمان بۆ دابین كردن بەرێگای تۆڕی ئینتەرنێتی میریەوە".

ئەوە لەکاتێکدایە لەدواهەمین كۆبونەوەی ئەنجومەنی ڕاوێژكاری وەزارەتی گواستنەوە و گەیاندن پرۆژەی تەندەری ڕاستەوخۆ بۆ قەزاو ناحیەكانی پارێزگای سلێمانی و پارێزگای هەڵەبجە و هەردوو ئیدارەی گەرمیان و ڕاپەڕین كە پرۆژەی فایبەر ئۆپتیك (FTTH)ی ئینتەرنێتی بێسنورە و پرۆژەكە بڕیاری لەسەر درا كە بخرێتە كێبڕكێی ڕاستەوخۆ بۆ كۆمپانیاكانی ئینتەرنێت.

ب.ح