گریا زەلامان یا ب حسابە!

4124 جار خوێندراوەتەوە

دھێتە زانین و بەحسکرن کو گەلەک بزەحمەت زەلام دکەتە گری، ئانکو نە وەکو ئافرەتێ یە کو زیکا بۆ ھەر تشتەکێ گریا وێ بھێتن، ئەگەر زەلامی کرە گری ئەو ل وی دەمی بزانە ریدانەک و بەلایەک و رەوشەکا گەلەک یا مەزن و گران و بێ سنور یا بچاڤێت خۆ دیتی و یا ھاتیە سەری و بوویە ئەگەر کو بکەتە گری.

بەری چەندەکێ دئێک چاڤپێکەفتنان دا ل کەنالەکێ کوردی دا، زەلامەکێ دھۆکی باس ل نەخۆشیێن ژیانا خۆ دکەت و دگەل دا گریا وی دھێتن، تۆ بێژی ڤی زەلامی چەند ژیانا وی نەخوش و بزەحمەت کەڤتیە، چەند گرانی و نە ئارامی دیتیە ژ ئەگەرێ ڤێ رەوشێ؟ دیارە گەلەک وگەلەک زەلام رۆژانە ژئەنجامێ دەستکورتی و ھەژاریێ و نەخۆشیێ دنالیت و نەشیا خۆ ڕاگریت و کرە گری پێش چاڤکێت کامیرێ، من باوەرە گەلەک زەلامێت دی ژی ھەنە گەھشتنە وی ڕادەیی کو بکەنە گری ژ دەست کورتی و ھەژاریێ ژ گرانیا بازاری ژ قەیرانێت بەردەوام، بەلێ پا مە و حکومەتێ ھایژێ نینە یانژی ئەم دزانین بەس ئەم خۆ پێ نا حەسینیت.

لڤێرە من دڤێت بێژمە ھەر لایەنەکێ سیاسی و ھەر بەرپرسەکێ مەزن و بچیک، نە دادپەروەری و قەیران گەلەک وگەلەک یا مەزن بووی و یا ژ سنورا دەربازبووی، ئەڤ گری و قەھرا زەلاما یا ب ھەروە نینە، دعا و گازیا دانعەمر و ستەملێکریا لشەڤا تاری یا ب ھەروە نینە، دێ باجا وێ بگرانی دەین، ئەگەر زیترین دەم لخۆ نەزڤرین و دادپەروەریێ بەلاڤ نەکەین و گەندەلیێ بنبر نەکەین خودێ دێ لسەر مە ھەمیا قولپینیت و تەر و ھشک پێکڤە دێ سوژن نە بەس بەرپرس بەلکو ئەم ھەمی دێ تێچین ودێ خۆزیا بۆ ئەڤرۆ یاخۆ یا بێ سەروبەر خازین، لەوما پێتڤیە ل خۆ بزڤرین و خەلەتیێت خۆ ڕاستڤەکەین تایبەت دەستهەلات.

و پێتڤیە بزانن کو خودێ دەرفەتێ ددەت بس ھەتا ھەتایێ بۆ ناھێلیت. و ھەروەسا ئەگەر دوماھیک ھات، سزایێ خودێ گەلەک دژوارە، (وكذلك أخذ ربك إذا أخذ القرى وهي ظالمة إن أخذه أليم شديد).