سەرنووچە:

دیاربوو کو جیاوازی دناڤبەرا ( کوکا کولایێ و پیبسیێ ) نینە !

11/5/2019 11:14:15 AM
3024 جار خوێندراوەتەوە
ئۆمێد حاجی بەڕۆشکی
+ -

پشتی چەند ساڵێن سەرۆک وەزیریا ( نێچیرڤان بارزانی ) و دەڕبازبوونا ھەرێمێ د چەندین قۆناخان دا، و لدۆماھیێ دروست بوونا قەیرانێن زۆر، و پەیدابوونا گەندەلیەکا زۆر و بھەدەردانا پارەیەکێ مەزن ژلایێ دەستھەڵاتداران ڤە لسەر حسابا موچەیێن فەرمانبەران، دکابینەیەکا نوو دا ( مەسرور بارزانی ) ژ بۆ جھێ ( نێچیرڤان بارزانی ) ھاتە ڤەگوھاستن و ( نێچیرڤان بارزانی ) ژی بۆ جھێ ( مەسعود بارزانی ) ھاتەڤەگوھاستن، دڕاستی دا ئەڤە نە گھوڕینن بەلکو ئەڤە تڕانەپێکرن و چەواشەکرنا ھاولاتیانە !

ھەر لدەستپێکا ڤەگۆھاستنا ( مەسروری ) بۆ جھێ ( نێچیرڤانی ) میدیایێن پارتی دانپێدانان ب شکەستن و لاوازیا حکومەتێن ( نێچیرڤان بارزانی ) کر، و وەسا دا دیارکرن کو ئەو گەندەلی و نەدادپەروەریا ژ ئەنجامێ دەستھەلاتا ئەوی دروست بووی، ( مەسرور ) دکابینەیا خۆ دا ناھێلیت، ودێ چاکسازیان کەت و دادپەروەریێ بەلاڤ کەت، بەشەک ژ ھاولاتیان ژی وەکو ھەر جار باوەر ژئەڤان پڕۆپاگندەیێن پارتی کر .

ھەر چەند لایەنێ بەرامبەر ژی ھەبوو کو باوەری ب ئەڤان پڕۆپاگندەیان نەبوو و جیاوازیا دناڤبەرا جووت پسمامان وەکو جیاوازیا دناڤبەرا ( کوکا کولایێ و پیبسیێ ) دانە زانین .

پێدڤیە نھا ئەم پرسیار بکەین ئەرێ ژ ڕاست ( مەسرور ) یێ جیاواز بوو و چاکسازی کرن ؟ یان ژی نەخێر دگەل پسمامێ خۆ چ جیاوازیەک نینە تا نھا ؟

ھەلبەت بەرسڤا ئەڤێ پرسیارێ ژی دێ ئەو کار و پێنگاڤ بن یێن حکومەتا ( مەسروری ) جێبەجێکرین، تا نھا پشتی دەڕبازبوونا ٤ مەھان ژ دەستبکاربوونا حکومەتێ چ پێنگاڤەک بۆ چاکسازیێ و ڤەگەڕاندنا پاشەکەڤتێ فەرمانبەران و دامەزراوەیکرنا سازیێن حکومەتێ نەھاتینە ھاڤێتن، بتنێ کارێ نۆی یێ حکومەتێ زێدەکرنا باجێ بوو لسەر ھاولاتیان و زێدەکرنا ئەرکێن فەرمانبەران بوو بەرامبەر ھەمان ئیمتیازاتێن کێم بۆ فەرمانبەران.

ئەڤە ژی وێ چەندێ دیاردکەت کو ھیچ جیاوازیەک دناڤبەرا حکومەتا پێشو و یا نھا نەبوویە، و ھەر وەکی جیاوازیا دناڤبەرا ( کوکا کولایێ و پیبسیێ ) بوویە .